بەرپرسێکی سادیقوون: سەردانەکەی نێچیرڤان بارزانی بۆ بەغدا گرنگە و پەیامێکی ئەرێنییە

 

 

ئەحمەد عەدنان، ئەندامی دەستەی گشتیی بزووتنەوەی سادیقوون، باڵی سیاسیی بزووتنەوەی عەسائیب ئەهلی حەق بە سەرۆکایەتیی قەیس خەزعەلی، رۆژی دووشەممە، 4ی ئایاری 2026، لەبارەی سەردانەکەی نێچیرڤان بارزانی بۆ بەغدا و کۆبوونەوەکانی لەگەڵ لایەنەکان، بە تۆڕی میدیایی رووداوی راگەیاند: "سەردانەکەی بەڕێز نێچیرڤان بارزانی گرنگە و دوای ئەو کرانەوەیە دێت کە لە پەیوەندییەکانی نێوان بەغدا و هەرێمی کوردستاندا دروست بووە. حکومەتی ناوەندی و هەموو لایەنە سیاسییەکانی نێو چوارچێوەی هەماهەنگی، یان لەسەر ئاستی هاوپەیمانیی بەڕێوەبردنی دەوڵەت، هیوایان بەو سەردانە هەیە."

 

ئەحمەد عەدنان گوتیشی: "دوای هەڵبژاردنی سەرۆککۆمار، پارتی دیموکراتی کوردستان هەڵوێستی هەبوو کە بەشداری لە حکومەتدا ناکات و نیگەرانە لە حکومەتی ناوەند. ئەم سەردانە پەیامێکی ئەرێنی و دڵنیاییە بۆ ناوەند و گەلی عێراق بەگشتی و هەرێمی کوردستان بەتایبەتی، دەتوانرێت بگەنە رێککەوتن و لێکتێگەیشتن لەبارەی شایستە دەستوورییەکانی کورد لەم حکومەتەدا."

 

ئەمڕۆ دووشەممە، نێچیرڤان بارزانی بە سەردانێک گەیشتە بەغدا و لە نووسینگەی نووری مالیکی، سەرۆکی هاوپەیمانیی دەوڵەتی یاسا، لەگەڵ سەرکردەکانی هاوپەیمانیی چوارچێوەی هاوئاهەنگی کۆبووەوە. 

 

بە گوتەی ئەندامەکەی دەستەی گشتیی بزووتنەوەی سادیقوون، وردەکاریی نێوەڕۆکی کۆبوونەوەکانی نێچیرڤان بارزانی و لایەنەکانی چوارچێوەی هاوئاهەنگی لە بارەی پێکهێنانی حکومەت و دابەشکردنی پۆستەکان، دەخرێتە بەردەم ئەو لیژنەیەی کە بۆ پێکهێنانی کابینەی وەزاری و دیاریکردنی پشکەکان دروست کراوە.

 

ئەحمەد عەدنان ئاماژەی بەوەدا دیدار و کۆبوونەوەکان دوو تەوەری سەرەکییان دەبێت؛ یەکەمیان، تاوتوێکردنی لێکتێگەیشتنەکان لەسەر شایستە دەستوورییەکان و دووەمیشیان، کێشەکانی نێوان هەولێر و بەغدا، وەک مووچە، نەوت و ناوچە کێشە لەسەرەکان، کە پێویستە بگەنە رێککەوتن لەبارەیانەوە.

 

ئەندامەکەی دەستەی گشتیی بزووتنەوەی سادیقوون راشیگەیاند، هەرێمی کوردستان بەشێکی سەرەکیی کۆمەڵگەی عێراقە و بزووتنەوەی سادیقوون هەمیشە بەشێک بووە لە چارەسەرکردنی کێشەکانی نێوان هەولێر و بەغدا، نەک بەشێک لە کێشەکە. ئاماژەی بەوەش کرد کە سادیقوون خوازیارە کێشەی مووچە و هەموو کێشەکانی دیکە چارەسەر بکرێن و باوەڕیان بەوەیە کە عێراق یەک پارچەیە "لە زاخۆوە تاوەکو فاو."