بە تۆمەتی مامەڵەکردن بە کارتی دەنگدان 46 کەس لە عێراق دەستگیرکران

 

 

دەزگای ئاسایشی نیشتمانیی عێراق، ئەمڕۆ شەممە 4ـی تشرینی یەکەمی 2025 لە راگەیێندراوێکدا بڵاویکردەوە، لە چەند ئۆپەراسیۆنێکی جیاوازدا 46 کەسیان بە تۆمەتی کڕین و فرۆشتنی نایاسایی کارتی دەنگدان دەستگیرکرد و دەستیشیان بەسەر هەزار و 841 کارتی دەنگداندا گرت.

 

بەگوێرەی راگەیێندراوەکە، ئۆپەراسیۆنەکان لەسەر بنەمای زانیاریی وردی هەواڵگری لە پارێزگاکانی بەغدا، ئەنبار، نەینەوا ئەنجامدراون و سەرجەم تۆمەتباران و کارتە دەستبەسەرداگیراوەکانیش رادەستی لایەنی دادوەریی پەیوەندیدار کراون بۆ ئەوەی رێکاری یاساییان بەرامبەر بگیرێتەبەر.

 

بڕیارە رۆژی 11-11-2025، هەڵبژاردنی پەرلەمانی عێراق بکرێ. پەرلەمانی عێراق لە 329 کورسی پێکدێ؛ 320یان گشتین و 9 کورسییان کۆتان. رۆژێک پێشتر، دەنگدانی تایبەت دەکرێ. 

 

عیماد جەمیل، سەرۆکی تیمی میدیایی کۆمیسیۆنی باڵای سەربەخۆی هەڵبژاردنەکانی عێراق بە تۆڕی میدیایی رووداوی گوت، 21 ملیۆن و 404 هەزار کەس کارتی بایۆمەتری و مافی دەنگدانیان هەیە، 20 ملیۆنیان دەنگدەری گشتی، یەک ملیۆن و 313 هەزاریان دەنگدەری تایبەت و زیاتر لە 26 هەزاریشیان ئاوارەن. 

 

بەگوێرەی ئامارەکانی کۆمیسیۆن، 29 ملیۆن کەس مافی دەنگدانیان هەیە، بەڵام 7 ملیۆن و 600 هەزار کەس بەهۆی نەبوونی کارتی دەنگدانەوە ناتوانن بەشداری بکەن. عیماد جەمیل گوتی "هۆکارەکان جیاوازن. بەشێکیان لە دەرەوەی وڵاتن، بەشێکیان مردوون، هەندێکیشیان ئارەزووی بەشداریکردن لە پرۆسەکە ناکەن."