سەرۆکایەتییەکانی عێراق: رێگە نادەین خاکەکەمان بۆ هێرشکردنە سەر دراوسێکانمان بەکاربهێندرێت

 

 

ئەمڕۆ پێنجشەممە، 5ی ئازاری 2026، لە کۆشکی بەغدا، کۆبوونەوەی لوتکەی سەرۆکایەتییەکان بە بەشداریی لەتیف رەشید سەرۆککۆمار، هەیبەت حەلبووسی سەرۆکی پەرلەمان، محەممەد شیاع سوودانی سەرۆک وەزیران و فایەق زێدان سەرۆکی ئەنجوومەنی باڵای دادوەری بەڕێوەچوو.

 

لە کۆبوونەوەکەدا، رەوشی ئەمنی و سیاسیی ناوچەکە و کاریگەرییەکانی لەسەر ناوخۆی عێراق بە وردی تاوتوێ کران، سەرۆکایەتییەکان پشتگیریی خۆیان بۆ رێکارەکانی حکومەت دەربڕی لە پێناو پاراستنی ئاسایش و سەروەریی وڵات و پاراستنی نێردە دیپلۆماسییەکان.

 

لە راگەیێندراوی کۆبوونەوەکەدا هاتووە: "عێراق رەتیدەکاتەوە خاکەکەی بۆ دەستدرێژیکردنە سەر وڵاتانی دراوسێ بەکاربهێندرێت، لە هەمان کاتدا هەموو جۆرە هێرشێک بۆ سەر شارەکانی عێراق و هەرێمی کوردستان رەتدەکەینەوە و بە پێشێلکاریی سەروەریی نیشتمانیی دەزانین."

 

سەرۆکایەتییەکان داوایان لە کۆمەڵگەی نێودەوڵەتی کرد بە پەلە بکەونە خۆ بۆ رێگریکردن لە فراوانبوونی بازنەی ململانێکان و جەختیان کردەوە کە دیالۆگ و رێگەی دیپلۆماسی تەنیا بژاردەن بۆ دوورخستنەوەی ناوچەکە لە مەترسییەکانی جەنگ.

 

لەسەر ئاستی ناوخۆ، جەخت لە تەواوکردنی شایستە دەستوورییەکان و بەهێزکردنی یەکڕیزیی نیشتمانی کرایەوە بۆ رووبەڕووبوونەوەی تەحەددییەکان، لەگەڵ بەردەوامبوونی حکومەت لە پرۆسەی چاکسازی و باشکردنی بژێوی و خزمەتگوزارییەکان بۆ هاووڵاتییان.

 

لە کۆتایی کۆبوونەوەکەدا، سەرۆکایەتییەکان هۆشدارییان دا لە بڵاوکردنەوەی دەنگۆ لە تۆڕە کۆمەڵایەتییەکان و رایانگەیاند، رێکاری یاسایی و دادوەری بەرامبەر هەر کەسێک دەگیرێتە بەر کە هەڕەشە لە ئاشتیی کۆمەڵایەتی و ئاسایشی ناوخۆیی وڵات بکات.