نوجەبا: رۆژی سێشەممە هەموو وێستگەکانی وزەى سەر بە ئەمریکا لە ناوچەکە دەبنە ئامانجمان
رووداو دیجیتاڵ
بزووتنەوەی نوجەبا کە یەکێکە لە گرووپە چەکدارە شیعەکانی عێراق کە وابەستەی ئێرانە، هۆشداری دەدات لەبارەی بەیانى رۆژى سێشەممە دۆناڵد ترەمپ، سەرۆکی ئەمریکا دیاریکردووە بۆ کردنەوەی تەنگەی هورمز و دەڵێت: "هەموو وێستگەکانتان لە ناوچەکە دەبنە ئامانجی موقاوەمە."
یەکشەممە 5ی نیسانی 2026، عەبدولقادر کەربەلایی، یاریدەدەری سەربازیی بزووتنەوەی نوجەبا لە راگەیێنراوێکدا ئەو هۆشدارییەی بڵاوکردەوە و تێیدا ئاماژەی بەوە دا کە بەیانیی رۆژی سێشەممە بنکە و وێستگەکانی وزەی سەر بە ئەمریکا لە ناوچەکە دەبنە "ئامانجی رەوای موقاوەمە".
دۆناڵد ترەمپ بەیانیی رۆژی سێشەممە 6ی نیسانی دیاریکردووە وەک دوا وادە بۆ کۆماری ئیسلامیی ئێران بۆ کردنەوەی تەنگەی هورمز و هەڕەشەی ئەوەی کرد کە پرد و وێستگەکانی کارەبای ئەو وڵاتە بۆردوومان دەکەن.
یاریدەدەری سەربازیی بزووتنەوەی نوجەبا رایگەیاند، کە هێڵی سووریان لەسەر هیچ کام لەو ئامانجانە نابێت بۆ بۆردوومانکردن.
لە 28ی شوباتەوە کە جەنگی ئێران لەگەڵ ئیسرائیل و ئەمریکا دەستی پێکردووە، بەهۆیەوە جووڵەی کەشتی لە تەنگەی هورمز پەکى کەوتووە.