ئاسایشی نیشتمانیی عێراق: دوو داعشی خۆکووژ لە ئەنبار خۆیان تەقاندەوە

 

ئەرشەد حاکم، گوتەبێژی دەزگای ئاسایشی نیشتمانیی عێراق، رۆژی هەینی، 6ـی شوباتی 2026، بە تۆڕی میدیایی رووداوی راگەیاند: "هێزەکانی دەزگاکەمان لە پارێزگای ئەنبار، لەسەر بنەمای زانیاریی هەواڵگریی ورد، توانییان حەشارگەیەکی تیرۆریستان گەمارۆ بدەن."

 

بەگوتەی گوتەبێژی دەزگای ئاسایشی نیشتمانیی عێراق، لەنێو حەشارگەکەدا "تیرۆریستێک" هەبووە کە لەنێو رێکخراوی داعش بەرپرسیارێتی هەبووە، لەگەڵ چەکدارێکی دیکە کە هاوڕێی بووە؛ ئاماژەی بەوەش کرد کە "لە کاتی گەمارۆدانەکەدا و پێش ئەوەی دەستگیربکرێن، هەردوو تیرۆریستەکە خۆیان تەقاندووەتەوە."

 

تورکی مەحلاوی، قائیمقامی قەزای قائیمیش بە تۆڕی میدیایی رووداوی راگەیاند، ئۆپەراسیۆنەکە لە گوندی (خەسیم) بووە و هێزێکی تایبەتی ئاسایشی نیشتمانی لە بەغداوە بۆ ئەو مەبەستە چووبوونە ناوچەکە.

 

تورکی مەحلاوی گوتیشی: "لە ئەنجامی تەقینەوەکەدا چەند ئەندامێکی هێزەکانی ئاسایشی نیشتمانی بریندار بوون."