داوا دەکرێت رێککەوتنەکەی عێراق لەگەڵ تورکیا لەسەر دۆسیەی ئاو ببرێتە پەرلەمان

 

فراکسیۆنی سادقون رۆژی پێنجشەممە، 6ی تشرینی دووەمی 2025، لە راگەیێندراوێکدا رایگەیاند: "پێویستە رێککەوتنەکە بخرێتە بەردەم پەرلەمانی عێراق بۆ ئەوەی گفتوگۆی ورد لەسەر هەموو بڕگەکانی بکرێت و رێکارە یاساییەکان بگیرێنەبەر پێش پەسندکردنی، چونکە رێککەوتنێکی نێودەوڵەتییە و عێراق بۆ چەندین ساڵ پێوەی پابەند دەبێت". 

 

محەممەد شیاع سوودانی، سەرۆکوەزیرانی عێراق، لە راگەیێندراوێکدا رایگەیاند: "رێککەوتنێکمان لەگەڵ تورکیا واژۆ کردووە کە لە مێژووی دەوڵەتی عێراقدا یەکەمە، بۆ مسۆگەرکردنی بەردەوامیی ئاو، سازش لەسەر مافە ئاوییەکانمان ناکەین و دەستبەرداری نابین ".

 

زۆزان عەلی، جێگری سەرۆکی لیژنەی کشتوکاڵ و ئاودێریی پەرلەمانی عێراق، بە تۆڕی میدیایی رووداوی راگەیاند، "ناوەڕۆکی رێککەوتنەکەی نێوان عێراق و تورکیا ئەوەیە کە تورکیا بۆ ماوەی 5 ساڵ ئاو بۆ عێراق بەردەداتەوە و چاوەڕوان دەکرێت لەم هەفتەیەدا نزیکەی یەک ملیار مەتر سێجا ئاو بۆ عێراق بەربدرێتەوە." 

 

زۆزان عەلی گوتی، "تاوەکو ئێستا هیچ بڕە ئاوێکی زیادە لە تورکیاوە بەرنەدراوەتەوە "

 

سەبارەت بەو دەنگۆیانەی باس لە رێککەوتنی "ئاو بەرامبەر بە نەوت" دەکەن، جێگری سەرۆکی لیژنەی کشتوکاڵ و ئاودێری گوتی، "تاوەکو ئێستا هیچ زانیارییەکی فەرمی لەبارەی بەندەکانی رێککەوتنەکە نەگەیشتووەتە دەسەڵاتداران و رای گشتیی عێراق، دەبێت رێککەوتنەکە بگاتە پەرلەمان تاوەکو پەسەند بکرێت. "

 

زۆزان عەلی گوتی: "عێراق بە دۆخێکی زۆر سەختدا تێدەپەڕێت و پێوەری وشکەساڵی گەیشتووەتە ئاستی 3.7، کە ئاستێکی "زۆر مەترسیدارە". هەروەها گوتی، "نزیکەی 70%ی زەوییە کشتوکاڵییەکانی عێراق بەهۆی کاریگەرییەکانی گۆڕانی کەشوهەواوە، کوالێتییان لەدەستداوە."