لە دەروازەیەکی عێراقدا دەست بەسەر 240 مۆری ناوی دەرماندا گیرا

 

 

عەلادین قەیسی، گوتەبێژی دەستەی دەروازە سنوورییەکانی عێراق، ئەمڕۆ یەکشەممە 07-12-2025، بە تۆڕی میدیایی رووداوی راگەیاند، "بەڕێوەبەرایەتیی دەروازەی سنووریی ترێبل بە هاوکاریی بنکەی گومرگ و فەرمانگە پشتیوانەکان، دوێنێ شەممە شۆفێرێکی تەکسییان دەستگیرکرد کە جانتایەکی سەفەری پێبوو و 240 مۆری تێدابوو کە ناوی کۆمپانیا جیاوازەکانی دەرمانیان لەسەر بوو."

 

دەروازەی ترێبل دەکەوێتە سنووری پارێزگای ئەنبار، خاڵی سنووریی نێوان عێراق و ئوردنە. عەلادین قەیسی گوتیشی، "مۆرەکان بە شێوەی پۆست لە نووسینگەیەکی گەشتیارییەوە نێردرابوون و هیچ رەزامەندییەکی وەزارەتی تەندروستیی عێراقیان نەبوو."

 

عەلادین قەیسی ئاماژەی بەوەش کرد، شۆفێرە عێراقییەکە لەگەڵ ئۆتۆمبێل و کەرەستە دەستبەسەرداگیراوەکان رەوانەی بنکەی پۆلیسی گومرگی ترێبل کراوە، بۆ ئەوەی بابەتەکە بخرێتە بەردەم دادوەری لێکۆڵینەوەی قەزاری روتبە و رێکاری یاسایی پێویست بەرامبەری بگیرێتە بەر.

 

عەلادین قەیسی روونی کردەوە، "ئەو مۆرانە بۆ ئەوە بەکاردەهێنرێن کە مۆری براندی کۆمپانیا جیهانییەکان لە دەرمانی بەرهەمهێندراوی نێوخۆیی بدەن، هەروەها دەرمانی رێگەپێنەدراو و بێ مۆڵەتی وەزارەتی تەندروستیی پێ ساخ بکەنەوە، کە ئەوەش مەترسییەکی گەورە لەسەر تەندروستیی نەخۆش دروست دەکات."

 

گوتەبێژی دەستەی دەروازە سنوورییەکان گوتیشی، "ئەو مۆرانە لە دەرمانی جیاواز دەدرێن، لەوانەش دەرمانەکانی شێرپەنجە، دڵ و بەرزیی پەستانی خوێن."