کەشناسی: شەپۆلێکی بەفر و باران هەرێمی کوردستان و عێراق دەگرێتەوە

 

 

ئەمڕۆ پێنجشەممە 08-01-2026 عامر جابری، گوتەبێژی دەستەی کەشناسی و بوومەلەرزەزانیی عێراق بە تۆڕی میدیایی رووداوی راگەیاند، "رۆژانی هەینی و شەممە شەپۆلێکی باران وڵات دەگرێتەوە؛ زۆرترین بڕی باران لە هەرێمی کوردستان و باکووری رۆژهەڵاتی عێراق دەبێت و کەمترین بڕیش لە شارەکانی باشوور تۆمار دەکرێت."

 

گوتەبێژی دەستەی کەشناسی ئاماژەی بەوە کرد، بەهۆی دابەزینی پلەی گەرماوە، پێشبینی دەکرێت لە ناوچە شاخاوییەکانی هەرێمی کوردستان بەفر ببارێت. سەبارەت بە باییش گوتی، "رۆژی شەممە ئاراستەی با دەگۆڕێت بۆ باکووری رۆژئاوا، ئەمەش دەبێتە هۆی دروستبوونی شەپۆلێکی تۆزی مامناوەند لە ناوچەکانی رۆژئاوا و باشووری رۆژئاوای عێراق."

 

بەپێی پێشبینییەکانی دەستەی کەشناسی، رۆژانی یەکشەممە و دووشەممە کەشوهەوا تاڕادەیەک جێگیر دەبێت، بەڵام لە شەوی دووشەممە لەسەر سێشەممە، شەپۆلێکی نوێی بارانبارین هەرێمی کوردستان و عێراق دەگرێتەوە.

 

لای خۆیەوە محەممەد کەمال، شارەزای کەشناسی بە رووداوی راگەیاند، شەپۆلەکە لە ئێوارەی سبەی هەینییەوە دەستپێدەکات و تاوەکو شەوی شەممە لەسەر یەکشەممە بەردەوام دەبێت؛ چڕترین کاتی بارانبارینەکەش بەیانیی رۆژی شەممە تاوەکو نیوەڕۆکەی دەبێت.

 

ئەو شارەزایە دەڵێت، "زۆرترین بڕی باران لە سلێمانی و ئیدارەی راپەڕین دەبێت. لەو ناوچە شاخاوییانەش کە بەرزییان زیاتر لە 1100 مەترە، ئەگەری بەفربارین هەیە وەک (ئامێدی، شیلادزێ، دێرەلووک، مێرگەسوور، وەرتێ، باڵەکایەتی و پێنجوێن)."

 

بەگوێرەی پێشبینییەکان، سبەی پلەی گەرما سێ پلە دادەبەزێت و رۆژی شەممەش سێ پلەی دیکە نزم دەبێتەوە.

 

 

هەولێر: 13 پلە

سلێمانی: 11 پلە

دهۆک: 9 پلە

کەرکووک: 14 پلە

هەڵەبجە: 12 پلە

ئیدارەی سۆران: 10 پلە

ئیدارەی ڕاپەڕین: 12 پلە

ئیدارەی گەرمیان: 15 پلە