کۆمیسیۆن پرۆسەی دەنگدانی لەبەردەم سەرۆککۆماری عێراق و UN تاقیکردەوە

 

سەرۆکایەتیی کۆماری عێراق رایگەیاند، "د.لەتیف جەمال رەشید سەردانی بارەگای کۆمسیۆنی باڵای سەربەخۆی هەڵبژاردنەکانی کرد بۆ ئاگاداربوون لە دوایین ئامادەکارییەکانی کۆمسیۆن بۆ رۆژی دەنگدان.''

 

بەپێی راگەیێنراوەکە: "سەرۆککۆماری عێراق داوای بەشدارییەکی بەرفراوان لە هەڵبژاردنەکاندا" دەکات و دەڵێت، "با خەڵک مافی دەستووریی خۆیان بەکاربهێنن، ئەم بەشدارییە هەنگاوێکی سەرەکییە بۆ چەسپاندنی دیموکراسی و بەهێزکردنی ئاسایش و سەقامگیری.''

 

رۆژی یەکشەممە دەنگدانی تایبەت و سێشەممەش 11-11-2025 دەنگدانی گشتی بۆهەڵبژاردنی پەرلەمانی عێراق بەڕێوەدەچێ، نەتەوە یەکگرتووەکان چاودێرێکی سەرەکی پرۆسەکە دەبێ، محەمةەد حەسان، نێردەی سکرتێری گشتیی نەتەوە یەکگرتووەکان لە عێراق لە سەردانەکەی رۆژی شەممە 8-11-2025 بۆ کۆمیسیۆن رایگەیاند: "هەڵبژاردنەکانی عێراق بە یەکێک لە سەربەخۆترین پڕۆسە هەڵبژاردنەکانی ناوچەی رۆژهەڵاتی ناوەڕاست دادەنرێت."

 

لە کۆمیسیۆن، لەبەردەم سەرۆککۆمار و نێردەی نەتەوە یەکگرتووەکان، شێوازی دەنگدان تاقیکرایەوە و قۆناخەکانی بەڕێوەچوونی پرۆسەکەی تێدا روونکرایەوە.

 

لە ماوەی دوو ساڵی رابردوودا، سێیەم هەڵبژاردنە کۆمیسیۆنی باڵای سەربەخۆی هەڵبژاردنەکان سەرپەرشتی دەکات، کانوونی یەکەمی 2023 هەڵبژاردنی ئەنجوومەنی پارێزگاکان و تشرینی یەکەمی 2024 هەڵبژاردنی پەرلەمانی کوردستان بەسەرپەرشتی کۆمیسیۆن بەڕێوەچوو، هەڵبژاردنی خولی شەشەمی پەرلەمانی عێراقیش کۆمیسیۆن سەرپەرشتی دەکات.