لە حەمرین و دیالە؛ دەزگای دژە تیرۆر دەستی بەسەر دوو کۆگای چەک و تەقەمەنیی داعشدا گرت

 

دەزگای دژە تیرۆری عێراق رۆژی یەکشەممە، 10ـی ئایاری 2026، لە راگەیێندراوێکدا رایگەیاند: "مەفرەزە ئەمنییەکانی دەزگاکەمان، پشتئەستوور بە زانیاریی وردی هەواڵگری و بەدواداچوونی مەیدانی بەردەوام، لە دوو ئۆپەراسیۆنی جیاوازدا توانییان دەست بەسەر دوو کۆگای چەک و تەقەمەنیدا بگرن لە زنجیرە چیاکانی حەمرین لە سنووری نێوان پارێزگاکانی سەلاحەددین و کەرکووک."

 

هەر بەپێی راگەیێندراوەکە، هێزەکانی دژە تیرۆر حەشارگەیەکی پاشماوەکانی داعشیان لە قەزای مەندەلی لە پارێزگای دیالە پشکنیوە و تێکیان داوە، کە چەندین مادەی تەقەمەنی و کەرەستەی سەربازی و کۆگایەکی تری تەقەمەنی تێدابووە.

 

بەپێی ئەو وێنانەی دەزگای دژە تیرۆری عێراق بڵاویکردوونەتەوە، جگە لە دەستبەسەراگرتنی ئەو چەک و تەقەمەنییانە، دەرکەوتووە کە چەکدارانی داعش پێداویستی رۆژانەیان لەو حەشارگانەدا داناوە، لەوانە جێگەی نوستن، ئامێری چێشتلێنان، بەهارات و هەموو ئەو پێداویستییانەی بۆ مانەوەی درێژخایەنیان لەو ناوچانەدا بەکاریان هێناوە.

 

دەزگای دژە تیرۆر دەڵێت، ئۆپەراسیۆنەکانیان بۆ راوەدوونانی پاشماوەکانی رێکخراوی داعش و پاراستنی سەقامگیریی ناوچەکە بەردەوام دەبن.