ئەنجوومەنی کۆمیسیاران: بڕیار و رێنماییەکانی هەڵبژاردن تەنیا لە ماڵپەری فەرمیمان بڵاودەکرێنەوە

 

 

بەیانی ئەمڕۆ هەینی 10ـی تشرینی یەکەمی 2025، ئەنجوومەنی کۆمیسیاران لە ماڵپەڕی فەرمییاندا، راگەیێندراوێکی بڵاوکردەوە و رایگەیاند، "کۆمیسیۆنی باڵای سەربەخۆی هەڵبژاردنەکان جەخت لە پەرۆشیی خۆی دەکاتەوە بۆ ئەنجامدانی هەڵبژاردنێکی ئازاد و پاک و بێگەرد و پابەندبوونی تەواوی بە جێبەجێکردنی هەموو ڕێوشوێن و ڕێنماییە دەرچووەکان سەبارەت بە بەڕێوەچوونی پڕۆسەی هەڵبژاردن لە قۆناخە جیاوازەکانیدا." 

 

دەشڵێت،  کۆمیسیۆن بە وردی و لێهاتووییەکی زۆرەوە کار دەکات بۆ جێبەجێکردنی ئەم رێوشوێن و ڕێنماییانە، بۆ دڵنیابوون لە بەدیهێنانی بنەماکانی پاکوخاوێنی، بێگەردی، شەفافیەت و یەکسانی لەنێوان هەموو بەشداربووانی پڕۆسەی هەڵبژاردندا.

 

هەروەها کۆمیسیۆن جەخت لەسەر ئامادەیی هەمیشەیی خۆی دەکاتەوە بۆ هاوکاری لەگەڵ هەموو لایەنە پەیوەندیدارەکان، بە شێوەیەک کە بەشداری بکات لە سەرکەوتنی پڕۆسەی هەڵبژاردن و بەدیهێنانی ئامانجە نیشتمانییەکانی و متمانەی هاووڵاتی بە ئەنجامەکانی پڕۆسەی هەڵبژاردن بەهێز بکات. 

 

لە بەشێکی دیکەی راگەیێندراوەکەدا هاتووە: "کۆمیسیۆن داوا لە سەرجەم کەسایەتی و لایەنە جیاوازەکان دەکات کە بایەخ بە کاروباری پرۆسەی هەڵبژاردن دەدەن، شوێنپێی ماڵپەڕی فەرمیی کۆمیسیۆن بکەون، چونکە ئەو ماڵپەڕە تاکە دەروازەی تایبەتە بۆ بڵاوکردنەوەی بڕیارەکانی ئەنجوومەنی کۆمیسیاران و ڕێوشوێن و رێنماییە دەرچووەکانی. هاوکات هیچ بڵاوکردنەوەیەکی بڕیار یان رێوشوێن یاخود رێنمایی لە دەرەوەی ئەم دەروازەیە پشت پێ نابەسترێت و جێگەی متمانە نییە." 

 

بەگوێرەی ئامارێک کە تۆڕی میدیایی رووداو لە کۆمسیۆنی باڵای سەربەخۆی هەڵبژاردنەکانی عێراقەوە دەستی کەوتووە، کۆی ژمارەی ئەو دەنگدەرانەی کە کارتی بایۆمەترییان هەیە و دەتوانن دەنگ بدەن 21 ملیۆن و 404 هەزار و 291 دەنگدەرن.