وەزارەتی گواستنەوەی عێراق بۆ رووداو: هێڵی ئاسمانیمان خاوەنی 39 فڕۆکەیە

 

 

ئەمڕۆ پێنجشەممە، مەیسەم سافی، گوتەبێژی وەزارەتی گواستنەوەی عێراق، بە رووداوی راگەیاند، ئێستا کۆمپانیای گشتیی هێڵی ئاسمانی عێراقییە 39 فڕۆکەی هەیە، لە ساڵی رابردووەوە تائێستا 7 فڕۆکەیان چاککردووەتەوە، بەرنامەیان هەیە 10 فڕۆکەی دیکەی لەکارکەوتوو چاکبکەنەوە.

 

دەشڵێت، 14 بزوێنەری فڕۆکەیان بەدەستگەیشتووە، بۆ ئەوەی فڕۆکە لەکارکەوتووەکانی پێ چاک بکرێتەوە. 

 

کۆمپانیای گشتیی هێڵی ئاسمانیی عێراقییە، کۆمپانیایەکی حکومییە و سەر بە وەزارەتی گواستنەوەی عێراقە، لە 1945 دامەزراوە. هێڵەکە گەشتی بۆ زیاتر لە 40 وڵات هەیە کە وڵاتانی رۆژهەڵاتی نێوەڕاست، ئاسیا، ئەفریقا و ئەورووپان. 

 

گوتەبێژی وەزارەتی گواستنەوەی عێراق گوتی، بڕیارە لە داهاتوودا کۆمپانیاکە فڕۆکەی دیکە بکڕێت و توانا و خزمەتگوزاریی هێڵەکە فراوانتر بکات.

 

رۆژی 4ی ئایاری 2024 یەکەم گەشتی راستەوخۆی هێڵی ئاسمانیی عێراقییە بۆ شاری بەیجینگی چین دەستپێدەکات. گەشتەکە لە فڕۆکەخانەی نێودەوڵەتیی بەغداوە دەستپێدەکات و دواتر دەچێتە فڕۆکەخانەی بەسرە و لەوێوە بۆ بەیجینگ.

 

گەشتەکان هەفتانە بۆ پایتەختی چین دوو رۆژ دەبن؛ شەممە و سێشەممە. گەڕانەوەش لە بەیجینگەوە رۆژانی یەکشەممە و چوارشەممە دەبێت.

 

ئەمە دەبێتە دووەمین هێڵی راستەوخۆی عێراق بۆ چین، دوای کردنەوەی هێڵی بەغدا- کوانجۆ کە رۆژی 10ی تشرینی یەکەمی 2023 دەستیپێکرد، کە ئەویش هەفتانە دوو گەشتی ئاسمانییە لەنێوان فڕۆکەخانەی بەغدا و کوانجۆ.