پلانێکی "تیرۆریستی" لە هامبۆرگی ئەڵمانیا پووچەڵکرایەوە

 

رۆژی سێشەممە، 12ـی ئایاری 2026، (سەنتەری نیشتمانی بۆ هاریکاری دادوەریی نێودەوڵەتی) لە راگەیێندراوێکدا گوتی، ئەو پلانە "تیرۆریستییە" لە قۆناخێکی پێشکەوتوودا بووە و ئامانج ئەوە بووە هێرش بکرێتە سەر کۆبوونەوەی خەڵک لەنێو شاری هامبۆرگ.

 

بەگوێرەی راگەیێندراوەکە، پووچەڵکردنەوەی پلانەکە دوای ئەوە هات کە لایەنی عێراقی زانیاری و بەڵگەی "زۆر گرنگ"ـی رادەستی ئەڵمانیا کرد، ئەمەش وایکرد لایەنی ئەڵمانی رێکاری خێرا بگرێتەبەر و بەر لە جێبەجێکردنی هێرشەکە، رێگری لێ بکات.

 

عەلی حوسێن جەفات، سەرۆکی (سەنتەری نیشتمانی بۆ هاریکاری دادوەریی نێودەوڵەتی) رایگەیاند: "ئەم پڕۆسەیە لە چوارچێوەی رێنماییەکانی فایەق زێدان، سەرۆکی ئەنجوومەنی باڵای دادوەری دێت بۆ بەهێزکردنی هاوئاهەنگیی دادوەری و ئاڵوگۆڕی زانیاری لەگەڵ وڵاتانی دۆست، بەتایبەت لە دۆسیەکانی پەیوەست بە بەرەنگاربوونەوەی تیرۆر و تاوانە رێکخراوەکان."

 

سەرۆکی سەنتەرەکە راشیگەیاند، سەرکەوتنی ئەم هەوڵانە گرنگیی هاوکاری دادوەری و ئەمنی نێوان وڵاتان دەردەخات بۆ پووچەڵکردنەوەی پلانە "تیرۆریستییەکان" بەر لە روودانیان.