پارێزگاری نەینەوا: بەمزووانە دۆسیەی ئەمنیی شنگال رادەستی پۆلیس دەکرێت

 

 

نەجم جبووری، پارێزگاری نەینەوا لە هەڤپەیڤینێکی رووداوی ئەمڕۆدا کە نوێنەر فاتیح پێشکێشی دەکات گوتی: "ئێستا 500 پۆلیس لەکۆی 1500 پۆلیسی شنگال و دەوروبەری لە کوردانی ئێزدین، کە بەرپرس دەبن لە ئاسایشی ناوخۆ و پێویستە لە شنگال تەنیا پۆلیس لەناو شارەکەدا بمێنێتەوە، هیچ لایەنێکی دیکەی تێدا نەبێت، سوپا و حەشد بچنە دەرەوەی شارەکە."

 

هەر لەو هەڤپەیڤینەدا پارێزگاری نەینەوا باس لە پەیوەندییەکانی خۆیان لەگەڵ هەرێمی کوردستان دەکات و دەڵێت: "پێموایە کوردستان قووڵاییە، ئێمەش بە هەمان شێوە قووڵایین بۆ ئەوان، کێشەکە ئەوەیە هەندێک لە سیاسییەکان حەزیان لە پەیوەندییەکی باش نییە لەگەڵ کوردستان، دەیانەوێت پەراوێزی بخەن، من پەیوەندیم باشە لەگەڵ کوردستان ئەوەش کاریگەری باشی هەبووە لەسەر دۆخی مووسڵ."

 

لەو هەڤپەیڤینەدا لەگەڵ رووداوی ئەمڕۆ، پارێزگاری نەینەوا باس لە دۆخی خزمەتگوزاریی، گرووپە چەکدارەکان و ناکۆکییە سیاسییەکان و دوایین ئەنجامەکانی لێکۆڵینەوە لە سووتانی هۆڵەکەی حەمدانییە دەکات.

 

 

 

نەجم جبووری: لێکۆڵینەوەکان ئێستا دوو بەشن، بەشێکیان ئەو لیژنەیەن کە لەلایەن بەڕێز سەرۆکوەزیرانەوە پێکهێنراوە بە سەرۆکایەتی وەزیری ناوخۆ، ژمارەیەک بڕیاری سەرەتاییان داوە، ئەو بەرپرسانەی حکومەتیان دەستنیشانکردووە کە ناڕاستەوخۆ هۆکاربوون بۆ رووداوەکە لەگەڵ خاوەنی هۆڵەکە و ستافەکەی، لە لایەکی دیکەوە دادگای پێداچوونەوە، واتا دادگای باڵا لە موسڵ ژمارەیەک دادوەری راسپاردووە لە حەمدانییە دەرگاکانیان واڵا کردووە و گوێ دەگرن لە کەسوکاری قوربانییان، کە سکاڵای کەسییان هەیە یان هەر کەسێک کە هەر زانیارییەکی هەبێت لەبارەی رووداوەکە، دەرگاکانیان واڵایە و گوێیان لێدەگرن.

 

 

نەجم جبووری: کارەساتەکە گەورەیە و هەمیشە لەم کارەساتانەدا خەڵک گومانی هەیە بەتایبەت کە هەموو ئەو دۆسییانەی لەم کابینەیەی حکومەت و کابینەکانی پێشتریش لێکۆڵینەوەیان تێدا کراوە زۆر کەس بڕوای نەکردووە بە لێکۆڵینەوەکان، بۆیە خەڵک مافی خۆیانە کە بڵێن لێکۆڵینەوەیەک کە لە ماوەیەکی کەمدا کراوە و یەکسەر ئەنجامەکانی دەرچوون، هاوکات چەند دیمەنێک هەبوون لە هۆڵەکەدا و چەند ئاماژەیەکی دیاریکراو کە خوێندنەوەی ئەوەی بۆ دەکرێت رەنگە ئەم رووداوە رووداوێکی ئاسایی نەبێت و رێکخراو بێت، لەبەرئەوە ئێمە رووبەڕوو بە خەڵکمان گوت، هەر کەسێک تەنانەت ئەگەر کەسیشی لەدەستنەدابێت هەر بەڵگەیەکی هەیە یان هەر ئاماژەیەکی هەیە دادگا کراوەیە و ئێمەش دەرگاکانمان کراوەیە و دەینێرین بۆ دەسەڵاتی دادوەریی، ئەگەر بۆ نموونە بترسێت لە لایەنێکی دیاریکراو یان کەسێک، با بێت بۆ لای ئێمە و زانیارییەکانمان بداتێ و ئێمە دەیگەیێنین بە دادگا. قەبارەی کارەساتەکە گەورەیە، بەرێز سەرۆکوەزیران ماوەی 72 کاژێری دانا کە لێکۆڵینەوەکان تەواو بکرێن و ئەو لێکۆڵینەوەیە تایبەتە بە چەند لایەنێکی دیاریکراو وەکو وەزارەتی ناوخۆ و بەرگری شارستانی، بەڵام دادگا دەرگاکانی کراوەن تائێستاش. 

 

 

نەجم جبووری: برینەکان قووڵن، قوربانییەکان مافی خۆیانە داوای هەر شتێک بکەن لەپێناو ئەوەی راستییەکەیان بە روونی بۆ دەربکەوێت، بەڵام من شتێک دەڵێم، من ئەو دادوەرانە دەناسم کە هەن، بە تایبەتی لە مووسڵ سەرۆکی دادگای تێهەڵچوونەوە و سەرۆکی ئەنجوومەنی باڵای دادوەریی بەهیچ جۆرێک سازش ناکەن و هیچیان لەسەر نییە، لەبەرئەوە لەگەڵ دەستپێکردنی لێکۆڵینەوەکانی حکومەت ئەوانیش دەستیانکردووە بە لێکۆڵینەوە.

 

 

نەجم جبووری: پێموانییە بەمزووانە بێت، ئەگەرچی لە دانیشتنێک زێدان خەڵەف، راوێژکاری سەرۆکوەزیران پێیگوتم کە چاوەڕوانی ئەنجامەکانی دادگا دەکەن، بەڵام دادگە دەرگاکانی کراوەن هەر بەڵگەیەک دەربکەوێت، هەر کەس هەر زانیارییەکی دەستبکەوێت ئامادەن جارێکی دیکە پەراوی لێکۆڵینەوەی بۆ بکەنەوە.

 

 

نەجم جبووری: ئەوەی موسڵ بینی و ئەوەی نەینەوا بینی دوای ئازادکردن، شارێکی وێرانە بوو بە تەواوی نە باڵەخانە و نە شەقام و نە پرد و نە نەخۆشخانە و تەنانەت هیچ فەرمانگەیەک لە فەرمانگەکانی حکومەت نەمابوون، کە وێران نەکرابن، داعش داروبەردی وێران کرد، ئێمە هەوڵماندا و شەو و رۆژ کارمان کرد، هەموو پردەکانی مووسڵمان بونیادنایەوە لە ناوەوە و لە دەرەوەی شارەکە لەماوەی سێ ساڵدا ئەوە شتێکی کەم نەبوو، شاری دیکە هەن داعش نەچووەتە ناویان بەڵام پردەکانیان 12 بۆ 13 ساڵە وێرانە، ئێمە زیاترمان لەو پردانە دروستکردەوە کە رووخێندرابوون.

 

بۆ نموونە ئەگەر باسی پۆلیس بکەین، تەواوی بنکەکانی پۆلیس وێرانکرابوون کە 260 بنکە بوون، ئێمە ئێستا 160 بۆ 170 بنکەمان دروستکردووەتەوە، ناڵێم گەیشتووینەتە ئاستێکی باڵا، ئێستا بۆ نموونە رەوشی تەندروستی لە موسڵ لە دۆخێکی باشدایە بەراورد بە پارێزگاکانی دیکە، پردمان بونیادناوە، نەخۆشخانەمان بونیادناوە، فەرمانگە حکومییەکانمان بونیادنایەوە، ئێستا پرۆژەکانی لای چەپی موسڵ باشترن لە 2014، کێشەمان ئێستا لە باڵەخانە ناحکومییەکاندا هەیە ئەوەش کاری حکومەتی خۆجێیی نییە ماڵە وێرانەکان دروست بکاتەوە، بەڵام هەوڵدەدەین قەرەبوویان بۆ وەربگرین، من لە سەرەتای 2020 ئەم بەرپرسیارێتییەم وەرگرت تەنیا دوو ملیار دینار وەرگیرابوو وەکو قەرەبوو، ئێستا گەیشتووینەتە نزیکەی 400 ملیار دینار، کە خەرجمان کردووە و بەردەوامین.

 

برینێکی سارێژنەکراومان هەیە لە موسڵی کۆن و لە شنگال، لەبارەی موسڵی کۆن بەمنزیکانە 273 خانوو لە رووکاری رووبارەکەوە دروست دەکەینەوە چونکە ئەوێ ناوچەیەکی شوێنەوارییە، بەڵام بەشێک لە برینەکانی سارێژ دەکەین، لەبارەی شنگالیش بەرێز سەرۆکوەزیران گوژمەیەک پارەی بۆ تەرخانکردوون و ئێمەش کاری تیدا دەکەین لە ناوچەکە بۆ نموونە ناحیەی سنونێ ئێستا زۆر ئاوەدانە هاوکات بەرێز سەرۆکوەزیران سندوقێکی تایبەتی بۆ شنگال دروستکردووە و رێککەوتنێک هەیە لەنێوان حکومەتی ناوەندی و حکومەتی هەرێمی کوردستان بۆ پێکهێنانی حکومەتی لۆکاڵی و دانانی قایمقام و بەڕێوەبەرە گشتییەکان.

 

 

نەجم جبووری: ناڵێم شتەکان ئاسانن، بەڵام یەکێک لە هۆکارەکانی کەوتنی موسڵ خراپیی پەیوەندییەکانی حکومەتی لۆکاڵی و حکومەتی ناوەندی بوو، بۆیە من کە ئەم بەرپرسیارێتییەم وەرگرت هەوڵمدا پەیوەندییەکی باش بونیادبنێین و پەرەی پێبدەین، پارێزگاکەمان لەو پارێزگایانەیە کە پەیوەندیی لەگەڵ حکومەتی ناوەندی باشە و بەرێز سەرۆکوەزیران نزیکە لێمان، بە دڵنیاییەوە شایستەکان هاوتا نین لەگەڵ ئەو وێرانەیەی کە هەمانە، بەڵام لەگەڵ ئەوەشدا کارمان کردووە بەو گوژمە پارانەی کە پێیانداوین، رێکخراوە نێودەوڵەتییەکان هاریکارییان کردووین، وەزیری نیشتەجێکردن بە هەمانشێوە، وەزارەتی تەندروستی هاوکاریی کردووین، بەڕێوەمان بردووە، هێشتا لە ئاستی خواستی ئێمەدا نییە، بەڵام بەڕێوەمان بردووە، بەپێی هەڵسەنگاندنی پسپۆڕەکانمان 15 بۆ 30 ملیار دۆلار زیان بە ژێرخانی مووسڵ کەوتووە، هەموو ئەوەی کە لە 2019ـەوە وەرمانگرتووە تاوەکو ئەمڕۆ نەگەیشتووەتە 3 ملیار دۆلار.  

 

 

نەجم جبووری: ئێمە لەوێ سوپامان هەیە، فیرقەیەکی تەواومان هەیە فیرقەی 20، حەشدی لێیە، دوو فەوجی پۆلیسی ئێزدی لێیە لە شنگال و سنونێ و ئەو ناوچانە، ئەو رێککەوتنەی لەبارەی شنگال کراوە ئێستا خەریکە جووڵەی تێدەکەوێت، ئێستا 500 پۆلیس لەکۆی 1500 پۆلیس ئێزدین و لەسەدا 20یش لە عەشیرەتەکانن، کە بەرپرس دەبن لە ئاسایشی ناوخۆ و بەمزووانە 500 کەسیان دەچنە مەشقەوە، پێویستە لە شنگال تەنیا پۆلیس لەناو شارەکەدا بمێنێتەوە هیچ لایەنێکی دیکەی تێدا نەبێت، سوپا و حەشد بچنە دەرەوەی شارەکە، تاوەکو دۆخەکە سەقامگیر ببێت، تاوەکو ئێزدییەکان هەست بکەن کە بەشێکن لەو لیوایەی بەرپرسە لە پاراستنی ناوچەکە، بەڵێ وەکو بوون فیرقەیەکی سەربازی لێیە، فەوجەکانی پۆلیسی لێن، حەشدی لێیە، بەڵام بوونی چەکدار و هێرشی وڵاتێکی هەرێمی ناوبەناو بۆ سەر شارەکە دەبێتە هۆی دروستکردنی نیگەرانی و ئاسایینەبوونەوەی رەوشەکە هەرکاتێک دەوڵەت توانی ئەوە چارەسەر بکات ئەوا باش دەبێت 

 

 

نەجم جبووری: ئێمە ئێستا شارەوانیمان هەیە لە شنگال، شارەوانیمان هەیە لە سنونێ، بەڵام گرفتەکە ئەوەیە فەرمانگەکان پەکخراون، نیوەیان لە شوێنی دیکە کار دەکەن وەکو قایمقام و بەڕێوەبەری ناحیەکان. ئێمە بەشێوەیەکی راستەوخۆ مامەڵە لەگەڵ سەرۆکی شارەوانی دەکەین، ئەوە شێوازێکی دروست نییە، ئێمە پێویستە قایمقامێکمان هەبێت لەوێ، ئەگەر بەڕێوەبەری ناحیەیەکمان هەبێت پێویستە لە ناحیەکەی بێت، دۆخەکە ئاسایی نییە پێویستمان بەوەیە قایمقام هەبێت، بەڕێوەبەری ناحیەکان هەبن، خەڵک هەست بکات کە دۆخەکە ئاساییە و هەرکەس کاری خۆی بکات.

 

 

نەجم جبووری: وەکو حەشدی شەعبی، کە لە دەستی بەرێز خزەیر مەتروحیدا بێت هیچ کێشەیەکمان نییە لەگەڵیدا پیاوێکی هاوکارە لەگەڵ هەموواندا تەنانەت لەگەڵ هێزەکانی هەرێمی کوردستانیشدا، هیچ کێشەیەکمان نییە، بەڵێ چەند گرووپێک هەن کە ئێمە دەڵێین نابێت ئەرکیان لەناو شارەکاندا بێت، بەڵێن دراوە کە کۆتایی ئەمساڵ پۆلیس دۆسیەی ئاسایش وەربگرێت، هیواخوازین پۆلیس ئەو دۆسێیە وەربگرێت ئەو گرووپانە و ئەوانەی دیکەش ببرێنە دەرەوە. ئەرکی سوپا لە دەرەوەی شارەکانە، دەمانەوێت ئاسایشی ناوخۆی شارەکان لە ئەستۆی پۆلیس بێت بە تەواوەتی، ئێستا ئێمە وەکو شاری موسڵ سیمایەکی چەکداریمان نییە، تەنانەت بازگەمان لەناو شارەکەدا نییە، بەڵام نیگەرانییەکە لە دەشتی نەینەوایە، من بۆچوونی خۆم بە بەڕێز سەرۆکوەزیران گوتووە، کە پۆلیسی ناوخۆ بەرپرسە، هەموومان پێزانینمان هەیە بۆ سوپا و خۆشمان دەوێت، بەڵام با لەدەرەوەی شار بێت، حەشد لە دەرەوەی شار بێت تەنیا پۆلیسی ناوخۆ لە ناوشاردا بێت.

 

 

نەجم جبووری: ببینە من لای خۆمەوە پێموایە کوردستان قووڵاییە بۆم، ئێمەش بە هەمانشێوە قووڵایین بۆ ئەوان، کێشەکە ئەوەیە هەندێک لە سیاسییەکان حەزیان لە پەیوەندییەکی باش نییە لەگەڵ کوردستان، دەیانەوێت پەراوێزی بخەن، من پەیوەندیم باشە لەگەڵ کوردستان ئەوەش کاریگەری باشی هەبووە لەسەر دۆخی موسڵ، هاریکاریی هەیە لە نێوانماندا، هاوئاهەنگییەکی گەورە هەیە لە نێوان من و کوردستان، ئێوە بیرتانە خەڵکی کوردستان باوەشیان بۆ کردینەوە کە ئاوارە بووین ئەوە شتێکی گەورەیە بەلای ئێمەوە، پەیوەندی لەگەڵ کوردستان زۆر باشە لای ئێمەوە، بەڵێ هەندێک هەوڵدەدەن تێکی بدەن، هەوڵدەدەن بیبچڕێنن، بەڵام بە روانینی ئێمە ئەوە هەڵەیە من تا سەر پارێزگار نابم، بەڵام رێنمایی ئەو کەسە دەکەم کە دوای من دێت پەیوەندییەکانی باش بێت لەگەڵ کوردستان، ئەگەر ویستی دیمەنەکە بشێوێنێت ئەوا با کێشە لەنێوان خۆی و کوردستاندا دروست بکات، بۆ نموونە کە ئەم کارەساتەمان بەسەرداهات لە حەمدانییە، ئەوان لە ئێمە نزیکتر بوون، دەستبەجێ ئامبوڵانسیان نارد و بە دەرمان و نەخۆشخانەکان هاوکارییان کردین، بۆچی من بێم ئەم پەیوەندییە تێکبدەم، لە بەرژەوەندیی کێ، هەیە دەیەوێت پەیوەندییەکە تێکبدات، ئەوە راستییە.

 

 

نەجم جبووری: راستی پلانم هەبوو و پلانیشم هەیە، بەڵام بەشێک لە لایەنە سیاسییەکان هەوڵیاندا دوورم بخەنەوە لە هەڵبژاردنەکە، یاسای ریشەکێشکردنیان بۆ زیندوو کردوومەتەوە و ئێستا بیریان کەوتووەتەوە، ئێمە تانەمان داوە لە دادگا، چاوەڕوانین، ئێمە رێز لە بڕیاری دادگە دەگرین هەرچی بڵێت، من پیاوێکم ئەوەی توانیم بەخشیم لە ئازادکردن و ئاوەدانکردنەوە، کورسیش تا سەر بۆ کەس نامێنێت.

 

 

نەجم جبووری: لیستەکە ئامادەیە، من لەگەڵ خزمەکانم قسەم کردووە لە موسڵ و پارێزگای نەینەوا داوام لێکردوون بەشدارییەکی بەهێز بکەن لە هەڵبژاردندا و چاکساز هەڵبژێرن، چونکە ئەگەر هەڵنەبژێرن، ئەوەی بونیادمان ناوە لە موسڵ لەدەست دەچێت.