مانگی داهاتوو فڕۆکەخانەی موسڵ دەکرێتەوە

 

 

محەممەد کاکەیی، سەرۆکى لیژنەى ئەمنى ئەنجوومەنى پارێزگاى نەینەوا بە تۆڕى میدیایی رووداوى راگەیاند: رۆژى 10ى حوزەیرانى 2025 دیاریکراوە بۆ کردنەوەى فڕۆکەخانەى نێودەوڵەتیى موسڵ و دەستپێکردنى گەشتەکانى.

 

رۆژی 10ى ئابى 2022، مستەفا کازمى، سەرۆکوەزیرانى ئەو کاتەى عێراق بەردى بناخەى نۆژەن و ئامادەکردنەوەى فڕۆکەخانەى نێودەوڵەتیى موسڵى دانا، کە لە پرۆژەیاسای بودجەى 2021 بڕیارى نۆژەنکردنەوە و ئامادەکردنى درا و لەلایەن دوو کۆمپانیاى فەرەنسی و سعودیەوە جێبەجێ دەکرێت.

 

محەممەد کاکەیی رایگەیاند: "کردنەوەى ئەو فڕۆکەخانەیە بە گەشتێکى فڕۆکەوانیى محەممەد شیاع سوودانى، سەرۆکوەزیران دەبێت کە لە بەغداوە بۆ فڕۆکەخانەکە دەیکات."

 

بودجەى ئەو پڕۆژەیە 200 ملیار دینارە و نیوەى لە پارەى بلۆککراوى پێشووى پارێزگاى نەینەوایە لە سەردەمى شەڕى داعش و نیوەکەى دیکەى لە بودجەى یاسای پاڵپشتیى خێراى ئاسایشى خۆراک و پەرەپێدان دابین دەکرێت.

 

سەرۆکى لیژنەى ئەمنى ئەنجوومەنى پارێزگاى نەینەوا گوتى: "هەمان رۆژ وەک یەک پاکێج، یەکەم هۆتێڵى پێنج ئەستێرەیی لە شارى موسڵ دەکرێتەوە".

 

فڕۆکەخانەى موسڵ لە ساڵى 1920 دەست بە بنیاتنانی کراوە و رووبەرەکەى 1600 دۆنمە.