قاسم ئەعرەجی بۆ رووداو: هیچ مەترسی و هەڕەشەیەک لەسەر هەرێمی کوردستان نییە

 

 

رۆژی چوارشەممە، 13ی ئایاری 2026، قاسم ئەعرەجی، راوێژکاری ئاسایشی نیشتمانیی عێراق بە تۆڕی میدیایی رووداوی راگەیاند، "لەگەڵ لایەنی ئێرانی گفتوگۆی وردمان کردووە و جەخت دەکەینەوە کە هیچ مەترسی و هەڕەشەیەک لەسەر هەرێمی کوردستان و هاووڵاتییانی نییە."

 

رۆژی دووشەممە 11ی ئایاری 2026، لیژنەی باڵای ئەمنیی عێراق و ئێران بە ئامادەبوونی بەرپرسانی باڵای هەردوولا لە بەغدا کۆبووەوە. مژاری سەرەکیی کۆبوونەوەکە تاوتوێکردنی رێککەوتنی ئەمنیی نێوان هەردوو وڵات بوو.

 

لەبارەی پرسی حیزبەکانی رۆژهەڵاتی کوردستان لە هەرێمی کوردستان و دۆسیەی ئەمنیی نێوان ئێران و وڵاتەکەی، قاسم ئەعرەجی گوتی، "کار دەکەین بۆ چارەسەرکردنیان لە رێگەی میکانیزم و رێکاری گونجاو کە سەقامگیریی ناوچەکە بپارێزێ."

 

راوێژکاری ئاسایشی نیشتمانیی عێراق باسی پاراستنی سەروەریی خاکی عێراق کرد و گوتی، "عێراق بەکارهێنانی خاکەکەی بۆ دەستدرێژیکردنە سەر هەر وڵات یان لایەنێک رەتدەکاتەوە، ئەمەش تەنیا هەڵوێستێکی دیپلۆماسی نییە، بەڵکو پابەندییەکی دەستوورییە و هیچ چاوپۆشییەکی لێناکرێ."

 

راوێژکاری ئاسایشی نیشتمانی دەڵێت، وڵاتەکەی نایەوێ ببێتە گۆڕەپانی ململانێی نێوان وڵاتان، "بەڵکو دەیەوێ ببێتە ناوەندێک بۆ بەیەک گەیشتن و پەیوەندی."

 

ئاماژەی بەوەش کرد کە عێراق خۆی لە ململانێکان بەدوور دەگرێ و "پەیوەندییە باشەکانی خۆی لەگەڵ کۆماری ئیسلامیی ئێران و ئەمریکا بەکاردەهێنێت بۆ ئەوەی رۆڵی هەبێت لە هێورکردنەوەی دۆخەکە و کەمکردنەوەی گرژییەکان."