سوودانی: بەشدارینەکردن لە هەڵبژاردن دەستبەرداربوونە لە مافی هاووڵاتییان بۆ هەڵبژاردنی نوێنەرانیان

 

 

نووسینگەی سەرۆکوەزیرانی عێراق بڵاویکردەوە، شەوی رابردوو 12ی تشرینی یەکەمی 2025 محەممەد شیاع سوودانی، سەرۆکوەزیرانی عێراق پێشوازیی لە سەرۆک هۆز و کەسایەتییە کۆمەڵایەتییەکانی ناوچەی تاجی لە باکووری بەغدا کردووە.

 

لە کۆبوونەوەکەدا سەرۆکوەزیرانی عێراق، جەختی لە "پێویستیی بەشداریی کارا لە هەڵبژاردنەکان و هەڵبژاردنی کەسی شایستە" کردەوە بۆ ئەوەی پرۆسەی ئاوەدانکردنەوە و گەشەپێدان بەردەوام بێت. ئاماژەی بەوەشدا، بەشدارینەکردن لە هەڵبژاردنەکاندا، دەستبەرداربوونە لە مافی هاووڵاتییان بۆ هەڵبژاردنی نوێنەرانیان. هەروەها دووپاتی کردەوە، پێداویستییەکانی هاووڵاتییان لە پێشەوەی بایەخەکانی حکومەت بوون و ماونەتەوە، کە پێکهێنانی حکومەت نزیکەی سێ ساڵ لەمەوبەر، دەرفەتێک بوو بۆ چاککردنەوەی پەیوەندیی نێوان دەوڵەت و هاووڵاتی.

 

ئاماژەی بەوەشدا، حکومەت چاکسازیی پێکهاتەیی گرنگی ئەنجام داوە، بەتایبەتی لە کەرتی ئابووریدا، هەروەها چارەسەری راستەقینەی بۆ قەیرانی سووتەمەنی داناوە، لە ڕێگەی پڕۆژەی جێبەجێکراو لەلایەن کۆمپانیا جیهانییەکان و بە هاوکاریی هەوڵی نیشتمانی. 

 

سوودانی، جەختی کردەوە، پڕکردنەوەی پێداویستییە نێوخۆییەکان بۆ سووتەمەنی، نزیکەی 4 ملیار دۆلار بۆ عێراق دەگەڕێنێتەوە، کە پێشتر بۆ هاوردەکردنی گاز تەرخان کرابوو.

 

سەرۆکوەزیران، ئاماژەی بەوەشکرد، حکومەت کاری کردووە بۆ دابینکردنی خزمەتگوزارییە سەرەکییەکان و بنەماکانی ژیانێکی شایستە و ئاسایش و سەقامگیری. هەروەها هەوڵی خزمەتگوزاری و ئەندازەیی پێکهێناوە، کە بەشداریی لە کەمکردنەوەی تێچوو و خێراکردنی جێبەجێکردندا کردووە لەو ناوچانەی کە ساڵانێکە هیچ خزمەتگوزارییەکیان نەبینیوە.

 

دووپاتیکردەوە، کۆمەڵگەی عێراقی، بە هەموو پێکهاتەکانییەوە، یەکگرتوو و پتەوە و توانیویەتی بە هۆشیاری و حیکمەتی پێکهاتەکانی کۆمەڵگە، بەتایبەتی هۆزە عەرەبییە رەسەنەکان، بەسەر ئاژاوە تائیفی و نەتەوەیی و ناوچەییەکاندا زاڵ بێت.

 

دووپاتیشی کردەوە، حکومەت کار بۆ دابینکردنی هەلیکار بۆ گەنجان و دەرچووانی زانکۆکان دەکات، لە رێگەی واژۆکردنی گرێبەست لەگەڵ کۆمپانیاکان و دەستپێکردنی پڕۆژە لە کەرتە جیاوازەکاندا.

 

سوودانی، ئاماژەی بەوەشکرد، عێراق بووەتە ژینگەیەکی ئارام بۆ وەبەرهێنان و کۆمپانیا عەرەبی و بیانییەکان بە گەرمی ڕووی تێدەکەن. جەختیشی کردەوە، حکومەت بە سیاسەتێکی هاوسەنگ و بەرپرسیارییەوە توانیویەتی بەرژەوەندییەکانی عێراق و عێراقییەکان بپارێزێت، کە بەهۆیەوە توانیویەتی کاریگەریی رووداوەکانی ناوچەکە تێپەڕێنێت و وڵات لە شەڕی بەوەکالەت بەدوور بگرێت. 

 

سوودانی، ئاماژەی بەوەشدا، ستایشی هەرێمی و نێودەوڵەتی بۆ هەڵوێستی عێراق هەیە، وەک بەشێک لە دۆخی سەقامگیریی ناوچەکە.