سەرچاوەکانی ئاوی عێراق: 750 ملیۆن مەتر سێجا ئاومان گلداوەتەوە

 

 

خالید شیمال، گوتەبێژی وەزارەتی سەرچاوەکانی ئاوی عێراق، ئەمڕۆ شەممە بە تۆڕی میدیایی رووداوی راگەیاند، وەزارەتەکەی لەڕێگەی پلانێکی پێشوەختە و بە پشتبەستن بە پێشبینییەکانی کەشوهەوا و داتای مانگە دەستکردەکان، توانیویەتی ئاڕاستەی ئاوەکان "بە باشترین شێوە" کۆنترۆڵ بکات.

 

 

 

- بەنداوەکان: یەدەگی ئاوی بەنداوەکانی عێراق زیاتر لە 750 ملیۆن مەتر سێجا زیادی کردووە.

 

- تەکنیکی هەڵگرتن: بەهۆی کەمکردنەوەی بەفیڕۆچوونی ئاو لە کۆگاکانی هەڵگرتن، توانراوە زیاتر لە 120 ملیۆن مەتر سێجای دیکە پاشەکەوت بکرێ.

 

 

گوتەبێژی وەزارەتی سەرچاوەکانی ئاوی عێراق ئاماژەی بەوە کرد، شەپۆلەکە کاریگەریی راستەوخۆی لەسەر بووژانەوەی دەریاچە و زۆنگاوەکان هەبووە، بەجۆرێک یەدەگی ئاوی دەریاچەی سەرسار بەپێی خەمڵاندنە سەرەتاییەکان زیاتر لە 200 ملیۆن مەتر سێجا زیادی کردووە؛ هەروەها زۆنگاوەکان لە باشووری عێراق کە پێشتر بەدەست وشکبوونەوە دەیانناڵاند، بە هەبوونی زیاتر لە 30 ملیۆن مەتر سێجا ئاو بووژێندراونەتەوە.

 

 

خالید شیمال دەڵێ، پشکێکی باشی شەپۆلەکە بۆ پارێزگای بەسرە بووە، بەجۆرێک زیاتر لە 35 ملیۆن مەتر سێجا ئاو گەیشتووەتە ئەو پارێزگایە و ئەوەش کاریگەری هەبووە بۆ دوورخستنەوەی چینی خوێ لەسەر شەتولعەرەب و دابینکردنی ئاوی خواردنەوە بۆ هاووڵاتییانی پارێزگاکە.