دووەم فڕۆکەی هاوکاریی عێراق بۆ غەززە بەرەو میسر بەڕێکەوت

 

 

رۆژی چوارشەممە 14-01-2026 فەریق سەعد مەعن، سەرۆکی شانەی راگەیاندنی ئەمنیی عێراق بە تۆڕی میدیایی رووداوی گوت، ئەمڕۆ دووەم کاروانی هاوکاریی عێراق بۆ دانیشتووانی کەرتی غەززە، لە بەغدای پایتەختەوە بەرەو فڕۆکەخانەی عەریش لە میسر بەڕێکەوت؛ دوای ئەوەی دوێنێ یەکەم فڕۆکە بەڕێکەوتبوو.

 

سەرۆکی شانەی راگەیاندنی ئەمنیی عێراق، ئاماژەی بەوە کرد، بڕیارە هاوکارییەکان لە فڕۆکەخانەی عەریشەوە لە رێگەی دەروازەی سنووریی رەفەحەوە بگەیێندرێنە ناو کەرتی غەززە. 

 

دوێنێ سێشەممە 13-01-2026، یەکەم فڕۆکەی عێراقیی پڕ لە هاوکاریی مرۆیی لە ساڵی 2026دا بەرەو شاری عەریشی میسر بەڕێکەوت، بۆ گەیاندنی بە کەرتی غەززە.  لیوا تەحسین خەفاجی، بەڕێوەبەری راگەیاندن لە وەزارەتی بەرگریی عێراق رایگەیاند، ئەم هاوکارییانە لەلایەن گەلی عێراقەوە پێشکێش کراون و لە چوارچێوەی هەڵوێستە مرۆییەکانە بۆ پاڵپشتیکردنی خەڵکی غەززە و کەمکردنەوەی مەینەتییەکانیان."