لە کەربەلا 'سەگێکی هار' هەڵدەکوتێتە سەر ماڵێک

 

 

بەڕێوەبەرایەتیی بەرگریی شارستانیی کەربەلا، رۆژی چوارشەممە 14-01-2026 لە راگەیێندراوێکدا بڵاویکردەوە، تیمەکانیان لە بوونی رووداوێکی کتوپڕ لە قەزای هیندیە ئاگادارکرانەوە، کە سەگێکی هار هەڵیکوتایە سەر ماڵێک.

 

بەرگریی شارستانیی کەربەلا ئاماژەی بەوە کرد، سەگەکە بووە هۆی ترس و دڵەڕاوکێی ئەندامانی خێزانەکە و ناچاری کردوون لە ژوورێکدا نەیەنە دەرەوە. تیمەکانی رزگارکردن دەستبەجێ گەیشتنە شوێنی رووداوەکە و توانییان ئەندامانی خێزانەکە بە سەلامەتی رزگار بکەن و بیانهێننە دەرەوە.

 

د. سەیف بەدر، گوتەبێژی وەزارەتی تەندروستیی عێراق رۆژی پێنجشەممە 08-01-2026 بە تۆڕی میدیایی رووداوی راگەیاند، "پار نزیکەی 50 هەزار رووداوی گازگرتنی سەگ لە سەرانسەری عێراق تۆمار کران، کە بەداخەوە بەهۆی سەختیی برینەکان و تووشبوون بە نەخۆشیی هاری، 19 کەس گیانیان لەدەستداوە."

 

عودەی جەندیل، گوتەبێژی ئەمیندارێتیی بەغدا رایگەیاند، پار تەنیا لە ماوەی 11 مانگدا لە رێگەی 1523 هەڵمەتەوە، 19 هەزار و 325 سەگی بەڕەڵڵایان بە "تفەنگی تاپڕ" لەنێوبردووە.

 

گوتەبێژی وەزارەتی تەندروستی هۆشداریی تووند دەدات لەوەی گازگرتنی سەگ تەنیا برینداربوونێکی سادە نییە، بەڵکو دەکرێت بەهۆی بەکتریا و ڤایرۆسەوە مەترسیی گەورە دروست بکات و دەڵێت، "نەخۆشیی هاری کوشندەیە؛ هەرچەندە شوێنی گازگرتنەکە لە سەر و دەموچاو بێت، مەترسییەکە گەورەتر دەبێت، بۆیە دەبێت بە زووترین کات ڤاکسین وەربگیرێت."