هاتووچۆی عێراق 90 رۆژ مۆڵەت دەداتە خاوەن ماتۆڕسکیلەکان

 

ئەمڕۆ شەممە 14-02-2026، عەمید نەسیر عەبدولستار، بەڕێوەبەری راگەیاندن و پەیوەندییەکان لە بەڕێوەبەرایەتیی هاتووچۆی عێراق بە تۆڕی میدیایی رووداوی راگەیاند، بۆ رێکخستنی سیستمی هاتووچۆی ماتۆڕسکیلەکان لە عێراق و تۆمارکردنیان بەشێوەیەکی یاسایی، فەریق عودەی سەمیر، بەڕێوەبەری گشتیی هاتووچۆ بڕیاری داوە بە پێدانی مۆڵەتی 90 رۆژ بە خاوەن ماتۆڕسکیلەکان.

 

بەگوێرەی بڕیارەکە، مۆڵەتەکە لە سبەی 15-02-2026 دەستپێدەکات تاوەکو 03-06-2026 و ئەو ماتۆڕسکیلانە دەگرێتەوە کە بە شێوەیەکی یاسایی هێنراونەتە عێراق، یان لە زیادکردنی ئاشکرا دا فرۆشراون.

 

عەمید نەسیر عەبدولستار ئاماژەی بەوەش دا ، خاوەن ماتۆڕسکیلەکان دەبێت لەو ماوەیە دا سەردانی بنکەکانی تۆمارکردن لە بەڕێوەبەرایەتییەکانی هاتووچۆی بەغدا و پارێزگاکان بکەن، بە مەبەستی تەواوکردنی رێکارەکانی تۆمارکردن و بەستنی تابلۆکانیان.

 

سەبارەت بە سزای سەرپێچیکاران، بەڕێوەبەری راگەیاندنی هاتووچۆی عێراق دەڵێت: "هەر کەسێک سەرپێچیی بڕیارەکە بکات، بە 200 هەزار دینار سزا دەدرێت و دەست بەسەر ماتۆڕسکیلەکەشیدا دەگیرێت."

 

بەڕێوەبەری راگەیاندنی هاتووچۆی عێراق ئەوەشی خستەڕوو، تاوەکو ئێستا ئامارێکی دروستی ژمارەی ماتۆڕسکیل لە عێراق نییە، بۆیە ئەمە دەبێتە هەنگاوێکی گرنگ بۆ رێکخستنیان.