وەزیری دارایی عێراق جلی تەسک و کورت و مەیکئەپی تۆخ لە فەرمانبەرانی قەدەخە دەکات

 

 

تەیف سامی، وەزیری دارایی عێراق رۆژی 09-10-2023 واژۆی لەسەر نووسراوێک کردووە کە تێیدا رێنوێنی دراوەتە بانک، دەستەکان و سەرجەم فەرمانگەکانی سەر بە وەزارەتی دارایی عێراق کە فەرمانبەرەکانیان پابەندی لەبەرکردنی جلی فەرمی بن؛ خۆیان دووربگرن لە لەبەرکردنی جلی تەسک، کاوبۆ و جلی کورت.

 

هەر لە نووسراوەکەدا هاتووە، دەبێت ژنان ئەو جلوبەرگانە لەبەر نەکەن کە رەنگەکەیان زۆر زەقە و نابێت مەیکئەپەکەیشیان تۆخ بێت.

 

ئەوەی کە پەیوەندیی بە پیاوانەوە هەیە، وەزارەتی دارایی عێراق داوایان لێ دەکات جوانکاری نەکەن و تاتۆ لەسەر جەستەیان نەبێت.

 

هەر لە نووسراوەکەدا وەزارەتی دارایی عێراق داوا دەکات، فەرمانبەرانی پرسگە جلوبەرگی فەرمی لەبەربکەن و بەشداری لە خوولەکانی تایبەت بە شێوازی مامەڵەی دروست بکەن.

 

وەزارەتی دارایی عێراق 17 هەزار 619 فەرمانبەری هەیە، ئەوەش بە گوێرەی یاسای بودجەی ساڵی 2023.