بەهۆی تەمەوە فڕۆکەخانەی بەغدا 8 کاژێر گەشتەکانی راگرت؛ 'دوو گەشتی هەولێر و سلێمانی دواخران'

 

ئەمڕۆ دووشەممە 15ی کانوونی یەکەمی 2025 مەیسەم سافی، گوتەبێژی وەزارەتی گواستنەوەی عێراق بە تۆڕی میدیایی رووداوی راگەیاند، بەهۆی بوونی تەم لە کاژێرەکانی دوای نیوەشەوەوە تاوەکو بەیانیی ئەمڕۆ، فڕۆکەخانەی بەغدا بە رووی گەشتە ئاسمانییەکاندا داخرا.

 

مەیسەم سافی گوتی، "ئێستا گەشتەکان ئاسایی بوونەتەوە."

 

هاوکات، ئەحمەد وەحید، بەڕێوەبەری بەشی پەیوەندییەکان و راگەیاندن لە بەڕێوەبەرایەتی فڕۆکەخانەکانی عێراق بە رووداوی گوت، "فڕۆکەخانەی بەغدا لە کاژێر 02:00 تاوەکو کاژێر 10:00ی بەیانی گەشتەکانی راگیران و بەو هۆیەوە 15 گەشتی ئاسمانی دواخران."

 

ئەحمەد وەحید ئاماژەی بەوەش کرد، "دوو لەو گەشتانە بۆ فڕۆکەخانەکانی هەولێر و سلێمانی بوون، بەڵام ئێستا گەشتەکان ئاسایی بوونەتەوە و بەگوێرەی ریزبەندی گەشتە دواخراوەکان قەرەبوو دەکرێنەوە."

 

ئەحمەد وەحید گوتیشی، داخستنەکە فڕۆکەخانەکانی بەسرە و موسڵی نەگرتەوە.