کۆمیسیۆنی هەڵبژاردن نموونەی فۆرمی دەنگدان بڵاودەکاتەوە

 

 

بەپێی ئەو نموونەیەی کۆمیسیۆن بڵاوی کردووەتەوە، هاووڵاتیان دەتوانن وێنەی فۆرمی رۆژی هەڵبژاردنی بازنەکانی خۆیان ببینن و بە ئاسانی ئەو بەربژێرە دەستنیشان بکەن، کە دەنگی پێدەدەن.

 

لە فۆرمەکەدا ناوی بەربژێر و ژمارەیەکەی و لۆگۆی لیستەکەی دانراوە. ئەوانەشی بەربژێری سەربەخۆن، ناو و وێنە و ژمارەکەیان لەسەر فۆڕمی دەنگدان هەیە. 

 

بەپێی نوێترین ئاماری کۆمیسیۆن کە 16-9-2021 بڵاویکردووەتەوە، لە کۆی نزیکەی 17 ملیۆن کارتی چاپکراوی بایۆمەتریی دەنگدان، نزیکەی 14 ملیۆنیان دراونەتەوە هاووڵاتیان. هەروەها دابەشکردنی کارتەکان تاوەکوو دوو رۆژ پێش هەڵبژاردن بەردەوام دەبێت.

 

رۆژی 8-9-2021، جومانە غەلای، گوتەبێژی کۆمیسیۆنی سەربەخۆی هەڵبژاردنەکانی عێراق لە راگەیێندراوێکدا رایگەیاند: "ئەو کاغەزەی دەنگدان کە لە هەڵبژاردنی ئەمجارە بەکاردەهێندرێت زۆر جیاوازە لەو کاغەزانەی لە هەڵبژاردنەکانی پێشوو بەکارهێندران؛ چونکە لە رووی ئەمنییەوە پارێزراوە و کۆدی تایبەتی لەسەرە کە تەنیا بە تیشکی ژێر وەنەوشەیی دەبیندرێت؛ تەنانەت کاغەزی دەنگدان لە رووی پێکهاتەی ماددییەوە جیاوازە و بە کاغەزی ئاسایی ناچێت".

 

هەروەها رۆژی 13-9-2021 نیبراس ئەبو سۆدە، یاریدەدەری گوتەبێژی کۆمیسیۆنی هەڵبژاردنەکان لە عێراق لە راگەیێندراوێکدا رایگەیاند: "ئەو ئامرازەی کە بۆ دەستنیشانکردن و دەنگدان لەسەر کاغەزی دەنگدان بەکاردەهێندرێت مۆرە و پێنووسی ئاسایی نییە، تەنانەت ئامێری سکانکردن و خوێندنەوەی دەنگەکان هیچ هێما و نووسینێک بە پێنووسی ئاسایی لەسەر کاغەزی دەنگدان ناخوێنێتەوە، واتا هەر کاغەزێکی دەنگدان بە پێنووسی ئاسایی لەسەری نووسرابێت بە پووچەڵ هەژمار دەکرێت و دەنگەکەی هەژمار ناکرێت".

 

بڕیارە رۆژی 10ی مانگی داهاتوو، هەڵبژاردنی پێشوەختەی ئەنجوومەنی نوێنەرانی عێراق بەڕێوەبچێت. بەپێی دوایین ئامارەکانی کۆمیسیۆنی باڵای سەربەخۆی هەڵبژاردنەکان، لە عێراق و هەرێمی کوردستان 24 ملیۆن و 907 هەزار و 679 کەس مافی دەنگدانیان هەیە.