کەتیبەکانی سەیدولشوهەدا بۆ رووداو: سزاکەى ئەمریکا بۆ سەرمان چاوەڕوانکراو بوو

 

 

چوارشەممە، 17ی ئەیلوولی 2025، کازم فەرتووسی، گوتەبێژی کەتیبەکانی سەیدولشوهەدا بە تۆڕی میدیایی رووداوی راگەیاند، سزا نوێیەکانی ئەمریکا لە دژی گرووپەکەی چاوەڕوانکراو بووە و پێشتریش هەنگاوی لەو جۆرەیان ناوە.

 

کازم فەرتووسی گوتی: "ئەو جۆرە بڕیارانەی ئەمریکا پێوانەکردنە بە دوو پێوەری جیاواز".

 

ئەو کاردانەوەیەی کەتیبەکانی سەیدولشوهەدا دوای ئەوە بوو، کە ئەمڕۆ مارکۆ روبیۆ، وەزیری دەرەوەی ئەمریکا رایگەیاند: وەزارەتەکەی بزووتنەوەی نوجەبا، کەتیبەکانی سەید شوهەدا، بزووتنەوەی ئەنساروڵڵا ئەوفیا و کەتیبەکانی ئیمام عەلیی عێراقی خستووەتە لیستی رێکخراوە "تیرۆریستییە بیانییەکان"ەوە.

 

لەبارەی کاریگەرییەکانی ئەو بڕیارەی واشنتن، گوتەبێژی کەتیبەکانی سەیدولشوهەدا رایگەیاند: "هیچ چالاکییەکمان لە دەرەوەی عێراق نییە، تاوەکو ئەو بڕیارە کاریگەری لەسەرمان هەبێت".

 

کەتیبەکانی سەیدلشوهەدا لە ساڵی 2013 دامەزراوە و لەنێو دەستەی حەشدی شەعبی بەشدارە، ئەبو ئالا وەلائی ئەمینداری گشتییەتی.

 

کازم فەرتووسی پێیوایە ئەو بڕیارەی وەزارەتی دەرەوەی ئەمریکا دەستوەردانە لە کاروباری ناوخۆی عێراق و گوتی: "پێشبینی دەکەین وەزارەتی دەرەوەی عێراق لەو بارەیەوە کاردانەوەی هەبێت".