وەزارەتی کشتوکاڵی عێراق: بەرزبوونەوەی نرخی مریشک پەیوەندی بە داخرانی تەنگەی هورمزەوە هەیە

 

رۆژی شەممە، 18ی نیسانی 2026، مەهدی جبووری، بریکاری وەزارەتی کشتوکاڵی عێراق بە تۆڕی میدیایی رووداوی راگەیاند، بەهۆی داخرانی تەنگەی هورمزەوە نرخی ئالیکی مریشک بەرزبووەتەوە و ئەوەش هۆکاری بەرزبوونەوەی نرخی مریشکی زیندووە.

 

بریکاری وەزارەتی کشتوکاڵی عێراق دەڵێت: "لەگەڵ هەرێمی کوردستان هاوئاهەنگیمان هەیە و هەر بەرهەمێک لە هەرێمی کوردستان کەم بێت یان بەشی پێویستیی نێوخۆ نەکات، رەوانەی پارێزگاکانی خواروو و نێوەڕاست ناکرێ."

 

مەهدی جبووری دڵنیایی دەدات کە نرخەکە دادەبەزێ و گوتیشی: "کارمان کردووە بۆ دابینکردنی ئالیک لە رێگەی دیکەوە و لە وڵاتانی دراوسێوە هاوردەی دەکەین."

 

بەڵام فیراس سدیق، بەڕێوەبەری سامانی ئاژەڵ لە وەزارەتی کشتوکاڵ و سەرچاوەکانی ئاوی هەرێمی کوردستان بە رووداوی گوت: "بەرزبوونەوەی نرخی مریشک پەیوەندی بە خستنەڕوو و خواستەوە هەیە."

 

لەبارەی تێچووی بەرهەمهێنان، بەڕێوەبەری سامانی ئاژەڵ ئاماژەی بەوە کرد کە وەرزی سەرما کاریگەری هەبووە و گوتی: "گرانبوونی نرخی سووتەمەنی هۆکارە. ئەو مریشکەی ئێستا لە بازاڕە، بەرهەمی مانگێک پێش ئێستایە کە تێچوویەکی زۆری هەبووە."

  

پێش 28ی شوبات و دەستپێکردنی جەنگی نێوان ئەمریکا/ئیسرائیل و ئێران، نرخی کیلۆیەک مریشک بە 2,300 بۆ 2,400 دینار بوو، بەڵام ئێستا لە بازاڕەکاندا کیلۆیەک بە 3,000 دینار و زیاتریش دەفرۆشرێ.

 

ئاماری پەلەوەرخانەکان و بەرهەمی ناوخۆ

بەپێی ئامارە فەرمییەکانی وەزارەتی کشتوکاڵ، کەرتی پەلەوەر لە هەرێمی کوردستان بەم شێوەیەیە:

ژمارەی پەلەوەرخانەکان: 1,995 پەلەوەرخانە.

بەخێوکردنی ساڵانە: زیاتر لە 105 ملیۆن مریشک.

بەرهەمی ساڵانەی گۆشت: نزیکەی 250 هەزار تۆن.

پێویستیی ناوخۆ: 146 هەزار تۆن.