عێراق و ئەمریکا دەستپێکردنەوەى هەناردەى نەوت تاوتوێ دەکەن

 

 

ئەو کۆبوونەوەیەى فوئاد حوسێن، وەزیرى دەرەوە لەگەڵ ستیڤ فەیگن، هەڵسوڕێنەرى کاروبارى باڵیۆزخانەى ئەمریکا لە عێراق 17ى ئابى 2025 لە بەغدا بەڕێوەچووە.

 

بەگوێرەى راگەیێندراوى وەزارەتى دەرەوەى عێراق، لەو کۆبوونەوەیەدا گفتوگۆ لەبارەی پەیوەندییە دووقۆڵییەکانی نێوان عێراق و ئەمریکا کراوە، بەتایبەتی سەبارەت بە رۆڵی کۆمپانیاکانى نەوتى ئەمریکا کە لە عێراق کار دەکەن.

 

لە راگەیێنراوەکەدا هاتووە، "باس لە کێشە هەڵپەسێردراوەکانی نێوان کۆمپانیاکانى نەوتى کارکەر لە هەرێمی کوردستان و رێگەکانی چارەسەرکردنیان کرا، بە شێوەیەک کە رێگە خۆش بکات بۆ دەستپێکردنەوەی هەناردەکردنی نەوت لە کێڵگەکانى هەرێمى کوردستانەوە."

 

13ی ئابی 2025 وەزارەتی سامانە سرووشتییەکان بڵاویکردەوە، کۆنووسی رێککەوتنی هەناردەکردنەوەی نەوتی هەرێمی کوردستان لەگەڵ حکومەتی عێراق بە واژۆی 23 کەسایەتیی شاندی هەردوولا واژۆ کراوە، لەسەر بنەمای رادەستکردنی نەوتی بەرهەمهێندراو لەگەڵ هێشتنەوەی 50 هەزار بەرمیل نەوتی رۆژانە بۆ پێداویستیی نێوخۆیی.

 

یەکێک لە بەربەستەکانی بەردەم رێککەوتنی هەولێر و بەغدا لەبارەی پرسی رادەستکردنی نەوت و هەناردەکردنەوەى، شایستە داراییەکانی کۆمپانیا بەرهەمهێنەرەکانە لە هەرێمی کوردستان، کە بەگوێرەی هەمواری یاسای بودجەی گشتیی عێراق، دەبێت بڕی 16 دۆلاریان بۆ گواستنەوە و بەرهەمهێنانی هەر بەرمیلێک پێبدرێ، تاوەکو دواتر کۆمپانیایەکی راوێژکاری تێچووەکان بۆ هەر کۆمپانیایەک بەجیا دیاری دەکات.