دوو قوتابخانە لە ئەنبار بەهۆی بڵاوبوونەوەی ئەنفلەوەنزاوە داخران

 

 

وەزارەتی تەندروستیی عێراق باس لەوە دەکات، بۆ 7 رۆژ مۆڵەتی ناچاری بە قوتابیان و ستافی وانەبێژانی هەردوو قوتابخانەکە دراوە.

 

ئەمڕۆ چوارشەممە، 19ی تشرینی دووەمی 2025، محەممەد دەڕاجی، گوتەبێژی تەندروستی ئەنبار بە تۆڕی میدیایی رووداوی راگەیاند، "ئەنفلەوەنزاکە بەهێزە و بەخێرایی بڵاودەبێتەوە، ژمارەیەکی زۆری قوتابیانی هەردوو قوتابخانەکەش تووشبوون کە چاکبوونەوەی هەر تووشبوویەک 5 بۆ 10 رۆژ دەخایەنێت."

 

گوتەبێژی تەندروستی ئەنبار گوتی، "بۆ پاراستنی قوتابیانی دیکە لە تووشبوونیان، بڕیاری داخستنی هەردوو قوتابخانەکە بۆ 5 رۆژ تاوەکو هەفتەیەک دراوە."

 

هەردوو قوتابخانەی ناوەندیی ئەبی زەڕی غەفاری بۆ کچان' و ناوەندیی ئەبی زەڕی غەفاری بۆ کوڕان، دەکەونە شاری روومادی لە پارێزگای ئەنبار.