سوودانی بۆ باڵیۆزی ئەمریکا: پابەندین بە پاراستنی نێردە دیپلۆماسییەکان و راوێژکارانی ئەمنی

 

 

نووسینگەی سەرۆکوەزیرانی عێراق، رۆژی دووشەممە 20-11-2023، لە راگەیێندراوێکدا بڵاویکردەوە، محەممەد شیاع سوودانی، سەرۆکوەزیرانی عێراق ئێوارەی رۆژی دووشەممە لەگەڵ ئەلینا رۆمانۆوسکی، باڵیۆزی ویلایەتە یەکگرتووەکانی ئەمریکا لە عێراق کۆبووەوە، پەیوەندییە دووقۆڵییەکانی نێوان هەردوو وڵات و دۆسیەکانی هاوکاری هاوبەشیان لە بوارە جیاجیاکان تاوتوێکردووە. هەروەک هاوکاری نێوان بانکی ناوەندی عێراقی و گەنجینەی ئەمریکی باس کرا کە هەفتەی داهاتوو هەردوولا کۆدەبنەوە و گفتوگۆ لەبارەی چەند تەوەرێک دەکەن.

 

 بە گوێرەی راگەیێندراوەکە، سوودانی و ئەلینا رۆمانۆوسکی "باسیان لە دۆخی غەززە و تاوانی کۆمەڵکوژیی هاووڵاتیان کە لەلایەن دەسەڵاتی ئیسرائیلەوە دەکرێت لەگەڵ قەبارەی ئەو پێشلکارییە مەترسیدارانەی مافی فەلەستنییەکان و خراپ و کەڵەکەبوونی دۆخی مرۆیی کردووە".

 

سەرۆکوەزیرانی عێراق، هەڵوێستی چەسپاوی عێراقی دووپاتکردەوە لە بەرامبەر دۆزی فەلەستین و گوتی، "پێویستە پەلامارەکانی هێزی داگیرکەر بووەستێت، رێڕەوی ئارام بکرێتەوە بۆ گەیاندنی هاوکاری خۆراک و پزیشکی بۆ هاووڵاتیان لەگەڵ گەرەنتی مافی فەڵەستییەکان لە ژیانێکی خۆش و ئارام بن".

 

هەر کۆبوونەوەکەدا سوودانی دووپاتیکردەوە: "عێراق پابەندە بە پارێزگاریکردن لە نێردە دیپلۆماسییەکان و راوێژکارانی ئەمنی لە چوارچێوەی هاوپەیمانی نێودەوڵەتی بەرەنگاربوونەوەی داعش". هەروەها جەختی کردەوە، "کە هێزە ئەمنییەکان ئەرکی یاسایی خۆیان بەجێ دەگەیێنن لە پاراستنی ئاسایش و سەقامگیریی خاکی عێراق". 

 

بەگوێرەی دوایین ئاماری وەزارەتی بەرگریی ئەمریکا - پێنتاگۆن، لە 17ی تشرینی یەکەمەوە 61 جار هێرش کراوەتە سەر هێزەکانی ئەمریکا و هاوپەیمانیی نێودەوڵەتی لە عێراق و سووریا و بەهۆی ئەو هێرشانەوە 58 سەربازیان بە سووکی بریندار بوون، بەڵام ئێستا سەرجەمیان گەڕاونەتەوە سەر ئەرکی خۆیان.

 

پێنتاگۆن دەڵێت، 33 لەو هێرشانە لە سووریا بوون و 28ەکەی دیکە لە عێراق بوون، بۆ سەرجەم هێرشەکانیش ئەمریکا گرووپە چەکدارەکانی نزیک لە ئێرانی تۆمەتبار کردووە کە ئەو هێرشانەیان ئەنجامداوە.

 

لە بەرامبەر ئەو هێرشانەش، سوپای ئەمریکا سێ جار بنکە و پێگەی ئەو گرووپە چەکدارانەی لەنێو سووریا کردووەتە ئامانج و بەگوێرەی راگەیێندراوەکانی پێنتاگۆن، لە ئەنجامی ئەو هێرشانە، زیانی گەورە بەو گرووپە چەکدارانە کەوتووە.