گومرگی عێراق: رێکارەکانی تۆمارکردنی ئۆتۆمبێلە بێسەرەتا و مۆدێل گۆڕدراوەکان دەستیپێکرد

 

 

سامر قاسم داوود، بەڕێوەبەری گشتیی دەستەی گشتیی گومرگەکانی عێراق، رۆژی سێشەممە 21ی نیسانی 2026، بە تۆڕی میدیایی رووداوی راگەیاند، "دەستمان کردووە بە رێکارەکانی جێبەجێکردنی بڕیاری ژمارە 102ی ساڵی 2026، کە تایبەتە بە تۆمارکردنی سێ جۆر لەو ئۆتۆمبێلانەی پێشتر تۆمار نەکراون و سەرپێچییان هەبووە."

 

بەڕێوەبەری گشتیی گومرگەکانی عێراق دەڵێت، "دەستەی گشتیی گومرگەکان دەستی کردووە بە وەرگرتنی دیسکی زانیارییەکان (CD) لە بەڕێوەبەرایەتیی گشتیی هاتووچۆی عێراقەوە، ئەوەش بە مەبەستی وردبینیکردنیان و دواتر گشتاندنیان بۆ ناوچە گومرگییەکانی (باکوور، رۆژئاوا، نێوەڕاست و باشوور)."

 

بەگوێرەی بڕیارە نوێیەکە، ئەو ئۆتۆمبێلانەی رێکارەکانی تۆمارکردن دەیانگرێتەوە، ئەو ئۆتۆمبێلانەن بە شێوەیەکی نایاسایی (بێسەرەتا) هاتوونەتە ناو عێراق، ئەو ئۆتۆمبێلانەی پێشتر بە شێوەیەکی نادروست تۆمار کراون، هەروەها ئەو ئۆتۆمبێلانەی مۆدێلیان لە مۆدێلی راستەقینەی ئۆتۆمبێلەکە بەرزترە یان جیاوازە.

 

سامر قاسم داوود دەڵێت، ئەم هەنگاوە بۆ تەواوکردنی پڕۆسەی تۆمارکردنی ئەو ئۆتۆمبێلانەیە بەپێی ئەو میکانیزمە یاساییەی کە بۆی دیاریکراوە.