عەلی فالح زەیدی سامانەکەی ئاشکرا کرد و وەزیرەکانیشی ئاگادار کردەوە

 

رۆژی پێنچشەممە، 21ـی ئایاری 2026، نووسینگەی سەرۆکوەزیران لە راگەیێندراوێکدا رایگەیاند، عەلی فالح زەیدی، سەرۆکوەزیرانی عێراق، فۆڕمی ئەستۆپاکی خۆی لەبارەی ئاشکراکردنی سەروەت و سامانەکانی پێشكێش دەستەی دەستپاکی کردووە، ئەم هەنگاوە لە چوارچێوەی چەسپاندنی بنەمای شەفافییەت و جێبەجێکردنی یاسای دەستەی دەسپاکی ژمارە 30ی ساڵی 2011ی هەموارکراودا.

 

بەگوێڕەی راگەیێنراوەکەی نووسینگەی سەرۆکوەزیران، عەلی فالح زەیدی وەک یەکەم بەرپرس لە نێو کابینە وەزارییەکەیدا، ئەم  کارەی کردووە.

 

عەلی محەممەد، بەڕێوەبەری راگەیاندن و پەیوەندییەکانی دەستەی دەستپاکیی عێراق، رۆژی پێنچشەممە، 21ـی ئایاری 2026، بە رووداوی راگەیاند :" هەر وەزیرێک لە سەرەتای وەرگرتنی پۆستەکەیدا دەبێت فۆڕمێک پڕبکاتەوە کە لە 9 لاپەرە پێکهاتووە، تێیدا هەموو ئەو سەروەت و سامانەی هەیەتی دەیاننووسێت، لە سەرەتای هەموو ساڵێکیشدا فۆڕمێکی دیکە هەیە یەک لاپەڕەیە بۆ ئەوەی بزاندرێت گۆڕانکاری چی روویداوە لە سامانەکەی دەینووسێت، بەناوی (فۆرمی گۆڕانکارییە ساڵانەکان) و ئەم فۆرمە بۆ ئەوەیە بەرپرسان ساڵانە هەر گۆڕانکارییەک لە دارایی و موڵک و ماڵیاندا رووی دا، تۆماری بکەن بۆ ئەوەی چاودێری وردی داراییان بکرێ."

 

بەڕێوەبەری راگەیاندن و پەیوەندییەکانی دەستەی دەستپاکیی عێراق، راشیگەیاند :" لە کۆتایی تەواوبوونی خولی حکومەت و پێکهێنانی حکومەتێکی دیکە، دیسانەوە وەزیرەکان دەبێت فۆڕمی کۆتایی پڕ بکەنەوە کە لەو چوار ساڵەدا چ سامان و سەروەتێکییان هەبووە."

 

سەرۆکوەزیرانی عێراق، ئەندامانی تیمی وەزارییەکەی راسپاردووە کە پێویستە بە زووترین کات و لە ماوەیەکدا کە لە "یەک هەفتە" تێپەڕ نەکات، لە دوای دەستبەکاربوونیانەوە سەروەت و سامانی خۆیان ئاشکرا بکەن و رادەستی دەستەی دەسپاکی بکەن.

 

 

وەزیرانەکان: 

 خالید شوانی، وەزیری  داد 

عەبدولڕەحیم شەممەرى، وەزیری  کشتوکاڵ 

سروە عەبدولواحید، وەزیری ژینگە 

وەهب حەسەنی، وەزیری گواستنەوە 

محەممەد کەربوولی، وەزیری پیشەسازی 

عەلی سەعد وەهیب، وەزیری  کارەبا