ئاسایشی نیشتمانیی عێراق: چاودێریی بڵاوکراوەکانی نێو سۆشیال میدیا دەکەین

 

 

بەگوێرەی ئاسایشی نیشتمانیی عێراق، هەندێک لەو بڵاوکراوانە ئامانج لێیان، "وروژاندنی فیتنە، ئاژاوەی تایەفی و سیاسی، شێواندنی راستییەکان و ساختەکردنی رووداوەکانە."

 

دەزگاکە جەخت دەکاتەوە لەوەی، "ئازادیی دەربڕینی بیروڕا بە واتای دەربازبوون لە سنوورە یاساییەکان یان پێشێلکردنی ئاسایشی نەتەوەیی و بنەما نیشتمانییەکان نایەت."

 

دەشڵێت، "هەر گوتارێکی هاندەر یان ناوەڕۆکێک کە هەڕەشە لە ئاشتیی کۆمەڵایەتی بکات، یان زیان بە یەکێتیی عێراق و گەلەکەی بگەیێنێت؛ بەپێی یاسا بەرکارەکان و لە رێگەی هاوئاهەنگی لەگەڵ دەسەڵاتی دادوەرییەوە مامەڵەی لەگەڵدا دەکرێت."

 

دەزگای ئاسایشی نیشتمانی داوا لە هاووڵاتییان و دەزگاکانی راگەیاندن دەکات، "بەرپرسیارێتیی نیشتمانییان هەبێت، وردبن لە گواستنەوەی زانیارییەکاندا و دوور بکەونەوە لە هەموو ئەو شتانەی دەبنە هۆی بڵاوکردنەوەی رق و کینە، ترس، دووبەرەکی یان گومان دروستکردن لەسەر دامەزراوەکانی دەوڵەت."

 

ئاسایشی نیشتمانیی عێراق دووپاتیشی دەکاتەوە، بەپێی ئەرکە دەستوورییەکانی؛ دەزگاکەیان مافی تەواوی هەیە بۆ گرتنەبەری رێوشوێنە یاساییەکان دژی هەر کەسێک کە رێگە بە خۆی دەدات، "هەڕەشە لە ئاشتیی کۆمەڵایەتی بکات، یان ئاژاوە بنێتەوە یان بیەوێت سیستمی گشتیی وڵات تێکبدات."