مالیکی لەنێوان مکوڕبوون و گۆشەگیریدا؛ کێ دەبێتە سەرۆکوەزیرانی داهاتووی عێراق؟

 

دۆخەکە بەجۆرێکە کەس ناتوانێت پێشبینی بکات کاژێرێکی دیکە چارەنووسی مالیکی چی دەبێت.

 

دکتۆر سەڵاح بووشی، ئەندامی دەوڵەتی یاسا دەڵێت: "بەڵێ، هەندێک هەوڵی کەسانێک هەن دەیانەوێت ژاوەژاو لەسەر بەربژێری سەرۆکوەزیران دروستبکەن، بەڵام چوارچێوەی هاوئاهەنگی و تەنانەت دەوڵەتی یاساش یەک ئامانجیان هەیە، ئەویش لەبەرچاوگرتنی بەرژەوەندیی گشتییە".

 

سەڵاح بووشی دەڵێت، "بێگومان ئەو ئامانجەش هێندە بە ئاسانی بەدی نایەت، بەڵام هەڵوێستەکان هێشتا یەکگرتوون."

 

ئەوانەی پێشتر و بەر لە پەیامەکەی دۆناڵد ترەمپ، پشتیوانیی نووری مالیکییان دەکرد بۆ ئەوەی خولێکی دیکەی سەرۆکایەتیی حکومەتی عێراق وەربگرێت، ئێستا وەک جاران دەنگیان دلێر نییە و دەڵێن، بۆ بەرژەوەندیی گەل و نیشتمان باشترە بەدوای کەسێکی دیکەدا بگەڕێن.

 

حەسەن شاکر کەعبی، پەرلەمانتاری رێکخراوی بەدر ئاماژە بەوە دەدات: "متمانەت هەبێت، لە کاتی پێویست و دیاریکراودا پۆستی سەرۆکوەزیرانی عێراق یەکلایی دەکەینەوە. بەمزووانە دەگەینە رێککەوتن لەسەر کەسێک بۆ پۆستی سەرۆکوەزیران، چونکە دۆخی سیاسی، خزمەتگوزاری و ئەمنی بەرگەی ئەم دواکەوتنە ناگرێت."

 

سەبارەت بە هەڵبژاردنی سەرۆککۆماریش، تاوەکو ئەم ساتە هیچ رێککەوتنێک لەنێوان پارتی و یەکێتیدا نییە، بەڵام رووداو زانیویەتی بافڵ تاڵەبانی، سەرۆکی یەکێتیی نیشتمانیی کوردستان کە 2 رۆژە لە بەغدایە و لەگەڵ سەرکردە سیاسییەکانی شیعە و سوننە کۆبووەتەوە، پێی گوتوون ئەوان ئامادەن بەم شێوەیەی ئێستا بچنە کۆبوونەوەی پەرلەمان و کێبڕکێ لەسەر پۆستی سەرۆککۆماری عێراق بکەن.