سوودانی بۆ تۆم باراک: رێگری لە دەستدرێژیکردنە سەر سەروەری وڵاتانی ناوچەکە بکرێت
رووداو دیجیتاڵ
محەممەد شیاع سوودانی، سەرۆکوەزیرانی عێراق و تۆم باراک، نێردەی ئەمریکا بۆ سووریا لە بەغدا کۆبوونەوە و تاوتوێی پەیوەندیی دووقۆڵیی نێوان هەردوو وڵات و دۆخی ناوچەکەیان کرد.
کۆبوونەوەکە رۆژی یەکشەممە، 22ـی شوباتی 2026 کرا. نووسینگەی رۆژنامەڤانیی سەرۆکوەزیرانی عێراق لەبارەی کۆبوونەوەکە دەڵێت، هەردوولا تاوتوێی پەیوەندیی دووقۆڵیی عێراق و ئەمریکا و دۆخی گشتیی ناوچەکە و ئەو هەوڵانەیان کردووە کە عێراق دەیدات لەپێناو سەقامگیریی هەرێمی بەتایبەت سووریا.
لە کۆبوونەوەکەدا، هەردوولا تێڕوانینی خۆیان لەبارەی رێگری لە پەرەسەندنی ئاڵۆزییە هەرێمییەکان و گرنگیی پەنابردن بۆ دیالۆگ و رێگە دیپلۆماسییەکان کردووە بۆ چارەسەری ناکۆکییەکان، لەگەڵ باسکردنی دەرفەتەکانی هاوکاریی ئابووری و پشتیوانیی گەشەپێدانی گشتگیر و درێژخایەن بۆ سەقامگیریی.
نووسینگەی سوودانی دەڵێت، سەرۆکوەزیران ئاماژەی بەوە کردووە، "گرنگە کێشە قووڵەکان چارەسەر بکرێن لە رێگەی چارەسەری ریشەیی بۆ هۆکارەکانیان و رێگریکردن لە دەستدرێژیکردنە سەر سەروەریی وڵاتان لە ناوچەکەدا".