شانەى راگەیاندنى ئەمنى: ئەو ئۆتۆمبێلەمان سووتاند کە لێیەوە هێرش کرایە سەر هاوپەیمانان

 

 

ئەو هێرشە مووشەکییە لە سنووری زووممار لە پارێزگای نەینەواوە ئەنجامدراوە و بنکەیەکی سەربازیی ئەمریکا لە رۆژئاوای کوردستان کراوەتە ئامانج.

 

شانەى راگەیاندنى ئەمنیى عێراق دەڵێت، "هێزەکانمان لە فەرماندەیی ئۆپەراسیۆنەکانى رۆژئاواى نەینەوا دەستیان بە گەڕان و پشکنین کرد بەدواى ئەو کەسانەى لە یاسا دەرچوون و هێرشەکەیان کردووە."

 

ئەوە یەکەمجارە لە 30ى کانوونى دووەمەوە گرووپە چەکدارەکانى نزیک لە ئێران لە عێراقەوە هێرش بکەنە سەر بنکەکانى هاوپەیمانان. هێرشەکە کاژێر 21:50ى شەوى رابردوو ئەنجامدراوە.

 

شانەی راگەیاندنى ئەمنیی عێراق دەڵێت، "هێزەکانمان ئەو ئۆتۆمبێلەیان دۆزیوەتەوە کە مووشەکەکانى لێوە هەڵدراوە و سووتاندویانە."

 

دوایین کاردانەوەى ئەمریکا بەرامبەر هێرشکردنە سەر بنکەکانى لە عێراق لە 7ى شوبات بوو، لە بۆردوومانێکدا ئەبوباقر ساعدی، یەکێک لە سەرکردەکانى کەتائیبی حیزبوڵڵاى عێراقى لە بەغدا کوشت.