سەدر لیژنەیەک بۆ بەدواداچوونی دەستگیرکراو و داواکراوانی رەوتەکەی پێکدەهێنێت

 

 

نووسینگەی تایبەتی موقتەدا سەدر، رێبەری رەوتی نیشتمانیی شیعە نووسراوێکی بڵاوکردەوە کە تێیدا هاتووە، لەسەر بنەمای راسپاردەی موقتەدا سەدر، لیژنەیەک بۆ بەدواداچوونی دۆسیەی دەستگیرکراوان و داواکراوانی رەوتی نیشتمانیی شیعە پێکهێنراوە.

 

سەرچاوەیەک لە رەوتی نیشتمانیی شیعە بە رووداوی راگەیاند، "داگیرکەری ئەمریکا لە دوای 2003 هەزاران کەسی بە تۆمەتی چەکداری مەهدی دەستگیرکرد، کە زۆریان هاووڵاتی سڤیل بوون و تەنیا خۆشەویستییان بۆ سەدر هەبوو."

 

ئەو سەرچاوەیەی رووداو دەڵێت، "2010 لیژنەیەک پێکهێنرا و زۆربەی دەستگیرکراوان ئازادکران و ئێستا تەنیا چەند کەسێک لە زیندانەکان ماونەتەوە و ئەم لیژنەیە بەدواداچوون بۆ کەیسی ئەوانە دەکات." گوتیشی: "گرنگترین کاری ئەم لیژنەیە بەدواداچوونە بۆ ئەو فەرمانی گرتنانەی کە بۆ ژمارەیەکی زۆر لە لایەنگرانی سەدر دەرچووە و لێکۆڵینەوە لە هۆکاری دەرچوونیان دەکرێت."

 

رەوتی سەدر لە دوای رووخانی رژێمی بەعس، لەساڵی 2004 و 2008 و 2009 چووە شەڕی بەردەوام لەگەڵ هێزەکانی ئەمریکا و لیوای یەومی مەوعودی دامەزراند و دواتر بووە سوپای مەهدی کە لەگەڵ حکومەتی عێراقیش بەشەڕهاتن و لە رووداوەکانی 2006 تاوەکو 2008 کە بەجەنگی نێوخۆیی عێراق هەژماردەکرێت، بە سەدان چەکداری کوژران و بەشێکیشیان دەستگیرکران.