20 هەزار خێزانی ئاوارەی کورد لە نەینەوا لە قەرەبووی مادەی 140 بێبەش دەبن

 

محەممەد کاکەیی، ئەندامی ئەنجوومەنی پارێزگای نەینەوا بە تۆڕی میدیایی رووداوی راگەیاند: "نزیکەی 20 هەزار خێزان کە ئاوارەی گوندەکانی دەوروبەری قەزاکانی حەمدانیە، باشیک و ناحیەی بەرتەلە-ن، کاتێک ویستوویانە قەرەبووی مادەی 140 وەربگرن، پێیانگوتراوە ناویان لە لیستی قەرەبووکردنەوە نییە و دەبوو پێشتر هەبووایە."

 

ئەو خێزانانە کوردى کاکەیی، شەبەک و ئێزیدین؛ لە زیاتر لە 27 گوندی ئەو ناوچانە ئاوارە بوون.

 

بەگوێرەی مادەی 140، هەر ئاوارەیەک 10 ملیۆن دینار و عەرەبی هاوردە 20 ملیۆن دینار قەرەبوو وەردەگرن.

 

محەممەد کاکەیی یەکێک بووە لەو خێزانە کوردانەی نەینەوا لە سەردەمی دەسەڵاتی حیزبی بەعس ئاوارە بوون و دەڵێت: "بە نووسراوی فەرمی لە رێگەی ئەنجوومەنى پارێزگاوە داوام لە لیژنەی باڵای مادەی 140 کرد ئەو ناوچانە دیاری بکرێت مادەکە لە نەینەوا دەیانگرێتەوە و ئەو ناوچانەی تێدایە کە ئەو هاووڵاتییە کوردانە لێی ئاوارە بوون."

 

نووسراوەکە لە 30ی تشرینی دووەمی 2025 لەلایەن سکرتێری گشتیی لیژنەی مادەی 140 ئاراستەی ئەنجوومەنی پارێزگا کراوە و ناوی ئەو ناوچانەی نەینەوای دیاری کردووە کە مادەی 140 دەیانگرێتەوە.

 

ناوچەکان بریتین لە قەزای شنگال و ناحیەکانی، قەزای شێخان و ناحیەکانی، حەمدانیە و ناحیەکانی، تلکێف و ناحیەکانی، ئاکرێ و ناحیەکانی، مەخموور و ناحیەکانی، لەگەڵ ناحیەکانی بەعاج، زووممار و قەحتانیە.