بکوژی هیشام هاشمی رادەستی وەزارەتی داد کراوە

 

دەزگای ئاسایشی نیشتمانیی عێراق بە نووسراوی فەرمی، وەڵامی لیژنەی مافی مرۆڤی پەرلەمانی عێراقی داوەتەوە و دەڵێت، "تاوانبار ئەحمەد حەمداوی عوێد معارج لە 10-05-2023 براوەتە فەرمانگەی چاکسازیی عێراقی سەر بە وەزارەتی داد، دوای ئەوەی بڕیاری لە سێدارەدانی بۆدەرچوو لە 07-05-2023".

 

رۆژی 7-5-2023، دادگەی تاوانەکانی رەسافە لە بەغدا سزای لەسێدارەدانی بۆ بکوژی هیشام هاشمی، شرۆڤەکاری سیاسی و ئەمنیی عێراقی دەرکرد کە تاوانبار ئەفسەرێکی وەزارەتی ناوخۆ بووە.

 

شەوی 6ـی تەممووزی 2020، هیشام هاشمی، شرۆڤەکاری سیاسی و ئەمنیی عێراقی و گۆشەنووسی تۆڕی میدیایی رووداو لەلایەن چەند چەکدارێکی نەناسراو لەبەردەم ماڵەکەی خۆی لە بەغدا لەلایەن ژمارەیەک چەکداری دەمامکدارەوە تەقەی لێکرا و کوژرا. دوای ساڵێک لە کوژرانی، مستەفا کازمی، سەرۆکوەزیرانی ئەو کاتی عێراق دەستگیرکردنی بکوژانی هاشمی راگەیاند. 

 

رۆژی 12-03-2023، مستەفا کازمی لە هەڤپەیڤینێکدا باسی لە خۆپێشاندانەکانی کۆتایی ساڵی 2019ـی عێراق کرد کە 600 گەنجیان تێدا کوژرا و نزیکەی 24 هەزار کەسیش بریندار بوون.

 

کازمی باسی "تیمی مەرگ"ـی کرد لەنێو دەزگا سەربازی و ئەمنییەکان و گوتی، "بوونیان لەنێو دەزگایەکی دیاریکراو دەقۆستەوە بۆئەوەی کاری کوشتنی چالاکڤانان و تۆقاندنیان بکەن. ئەوان دەستگیرکران و دانیان بە تاوانی گەورەدا نا؛ ئەو کەسەشی کە هیشام هاشمی کوشت، ئەفسەری وەزارەتی ناوخۆ بوو و لەگەڵ یەکێک لە گرووپە چەکدارەکان کاری دەکرد".