مستەفا کازمی: دەبێت داعش باجی هەموو ئەو دەبەنگییانەی بداتەوە کە ئەنجامی داون

سەرۆکوەزیرانی عێراق لەسەر سنووری نێوان عێراق- سووریا رایگەیاند، هەموو رۆژێک چاودێری بەرەوپێشچوون و رووداوە جیاوازەکان دەکەن و هێزە ئەمنییەکان و سەربازەکانیان دەتوانن عێراق بپارێزن و بە چەکدارانی داعشی گوت: "ئێمەتان تاقیکردەوە و سەرکەوتوو نەبوون، دووبارە ئێوە لەم شەڕەدا شکستدەهێنن." 

 

رۆژی چوارشەممە 26ـی کانوونی دووەمی 2022، مستەفا کازمی، سەرۆکوەزیرانی عێراق، بە یاوەری جومعە عیناد، وەزیری بەرگریی و عوسمان غانمی، وەزیری ناوخۆ، سەردانی سنووری عێراق –سووریای کرد لە قەزای شنگال لە سنووری پارێزگای نەینەوا و لەگەڵ بەرپرسانی سوپای عێراق کۆبووەوە و رایگەیاند، "دەبێت داعش باجی هەموو ئەو دەبەنگییانە بداتەوە کە ئەنجامی داون."

 

سەرۆکوەزیرانی عێراق لە کۆبوونەوەکەدا لەگەڵ هێزە ئەمنییەکان پەیامێکی ئاڕاستەی داعش کرد و گوتی، "تاقیمان نەکەنەوە، زۆر هەوڵتاندا و شکستانهێنا، زۆر هەوڵی دیکە دەدەن و دووبارە شکستدەهێنن، باش دەزانن ئێمە بە دوای ئێوەوەین، باش دەزانن خوێنی هەر عێراقییەک بە لای ئێمەوە زۆر گرنگە."

 

بەگوێرەی نوسینگەی راگەیاندنی سەرۆکوەزیرانی عێراق، کازمی بە فەرماندە سەربازییەکانی گوتووە: "پێویستە پلانی خۆتان هەبێت و بە بەردەوامی کاربکەن، ئەم سنوورە بۆ ئێمە و بۆ دوژمنانیش زۆر گرنگە، تواناکانتان بخەنەگەڕ و کار بکەن بۆ پاراستنی." 

 

عێراق بە درێژایی نزیکەی 600 کیلۆمەتر هاوسنوورە لەگەڵ سووریا. دوای ئەوەی کە چەکدارانی داعش هەفتەی رابردوو هێرشیانکردە سەر زیندانی غوێران لە حەسەکە و بەشێک لە داعشە زیندانییەکان هەڵاتن، بەشێک لە چاودێرانی سیاسی وەکو مەترسییەک بۆسەر عێراق لێکدانەوەیان بۆ دۆخەکە کرد، چونکە ئەگەری هەیە ئەو چەکدارانە خۆیان دەربازی عێراق بکەن.