لە کەرکووک سێ کەس بە تۆمەتی دزینی 720 ملیۆن دیناری خانەنشینان دەستگیر دەکرێن

 

سەرچاوەیەکی ئاگادار لە بەڕێوەبەرایەتیی خانەنشینیی کەرکووک، ئەمڕۆ (26-01-2025) بە تۆڕی میدیایی رووداوی گوت، لەسەر ئەو کەیسە رۆژی پێنجشەممەی رابردوو، سێ فەرمانبەری خانەنشینی کەرکووک بە بڕیاری دادوەر لە بنکەی پۆلیسی قۆریە دەستبەسەرکراون و بڕیارە ئەمڕۆ ببرێنە بەردەم دادوەر.

 

بەگوێرەی راگەیێندراوێکی دەستەی دەستپاکی فیدراڵی، لە کەرکووک تۆڕێکیان هەڵوەشاندووەتەوە، کە کاریان لەسەر تێکدانی سیستمی خەرجکردنی جیاوازییەکانی خانەنشینی کردووە و بە ناڕەوا پارەیان بۆ ژمارەیەکی زۆر خانەنشین خەرج کردووە، دواتر پارەکەیان بۆ خۆیان بردووە.

 

دەستەی دەستپاکیی فیدراڵی دەڵێت، تۆڕەکە چوونەتە نێو هەژماری خانەنشینان و زیاتر لە 720 ملیۆن دیناریان بۆ ژمارەیەکی زۆر لە خانەنشین بە نایاسایی خەرج کردووە ، دواتر دەستیان بەسەر ئەو پارانەدا گرتووە، کە بە زیادە خەرج کرابوون.

 

دەستەی دەستپاکیی لە راگەیێندراوێکدا کە رۆژی هەینی 24-01-2025 بڵاوی کردووەتەوە، ئاماژەی بەوەداوە، تۆڕەکە لە سێ ئەندام پێکهاتووە، لە دەستەی خانەنشینیی نیشتمانی لقی کەرکووک کاردەکەن، لایەنی دەرەکی هاوکاری تۆڕەکەیان کردووە و دەستکاریی نزیکەی 80 دۆسیەی خانەنشینانیان کردووە.

 

تۆمەتبارەکان پەڕاویان بۆ کراوەتەوە، بە تەواوی بەڵگەکانەوە دۆسیەکانیان رەوانەی دادگا کراوە. دادگەش بڕیاری دەستبەسەربکرێن و لێکۆڵینەوەیان لەگەڵدا بکرێت.