سوودانی لیژنەیەک بۆ دامەزراندنی بەڕێوەبەرایەتیی کۆکردنەوەی داهاتە گشتییەکان پێکدەهێنێت

 

ئەمڕۆ دووشەممە 26-01-2026، محەممەد شیاع سوودانی، سەرۆکوەزیرانی عێراق سەرپەرشتیی کۆبوونەوەی ئەنجوومەنی وەزاریی بۆ کاروباری ئابووری کرد. بەگوێرەی راگەیێندراوی نووسینگەکەی، لە کۆبوونەوەکەدا گفتوگۆ لەبارەی رێکارەکانی زیادکردنی داهاتەکان و کەمکردنەوەی خەرجییەکان کرا، بەجۆرێک لەگەڵ پێداویستییەکانی قۆناخی ئێستا و کاری لەپێشینەی سیاسەتی داراییی دەوڵەت بگونجێت.

 

لە کۆبوونەوەکەدا کە وەزیرانی دارایی، پیشەسازی، بازرگانی و کار و کاروباری کۆمەڵایەتی تێیدا ئامادەبوون، پێشنیازی دامەزراندنی "بەڕێوەبەرایەتیی کۆکردنەوەی داهاتە گشتییەکان" خرایەڕوو.

 

محەممەد شیاع سوودانی فەرمانی کرد لیژنەیەک پێکبهێندرێت بۆ ئامادەکردنی پێکهاتە، فەرمانگە، ئەرک و بەرپرسیارێتییەکانی ئەو بەڕێوەبەرایەتییە و دابینکردنی پێداویستییە تەکنیکی و لۆجستییەکانی، تاوەکو لە کۆبوونەوەکانی داهاتوودا گفتوگۆیان لەسەر بکرێت.

 

ئابووریی عێراق بەشێوەیەکی سەرەکی پشت بە داهاتی فرۆشتنی نەوت دەبەستێت کە 90٪ـی داهاتی گشتی پێکدەهێنێت و تەنیا 10٪ـی داهاتەکان نانەوتین.

 

هەر لە کۆبوونەوەکەی ئەمڕۆدا، پێداچوونەوە بە رێژەی پاڵپشتیی بەرهەمە نەوتییەکان و میکانیزمی پاڵپشتیی پێشکێشکراو لەلایەن سندووقی پاڵپشتیی هەناردەکردنەوە کرا.