10 ئەندامی ئەنجوومەنی پارێزگای دیالە داوای هەڵوەشاندنەوەی قەزا نوێیەکان دەکەن

 

10 ئەندام لە کۆی 15 ئەندامی ئەنجوومەنی پارێزگای دیالە، نووسراوێکی فەرمییان ئاراستەی سەرۆکایەتیی ئەنجوومەن کردووە، وێنەیەکی دەست تۆڕی میدیایی رووداو کەوتووە و تێیدا داوای هەڵوەشاندنەوەی بڕیاری دروستکردنی ئەو قەزا و ناحیە نوێیانە دەکەن کە لەم دواییانەدا پەسند کراون.

 

تورکی جەدعان، سەرۆکی فراکسیۆنی رێکخراوی بەدر لە ئەنجوومەنی پارێزگای دیالە، یەکێکە لە واژۆکارانی یاداشتەکە، رۆژی پێنجشەممە 26-02-2026 بە تۆڕی میدیایی رووداوی راگەیاند: "لەو دانیشتنەی بڕیاردرا ناحیەی خان بەنی سەعد بکرێتە قەزا، کاتێک گەیشتە سەر پرسی قەرەتەپە و گوڵاڵە، رێژەی یاسایی نەما، کەچی سەرۆکی ئەنجوومەنی پارێزگا بە ساختەکاری نووسراوی بۆ وەزارەتی پلاندانانی عێراق کردووە و لەسەر ئەو بنەمایە بڕیاری بەقەزاکردنیان دەرچووە."

 

جەدعان جەختی لەوەش کردەوە، ئەوان وەک 10 ئەندامی ئەنجوومەن سوورن لەسەر هەڵوەشاندنەوەی بڕیارەکان و گوتیشی: "لەسەر ئەو ساختەکارییە، لێپرسینەوە لەگەڵ عومەر کروی، سەرۆکی ئەنجوومەنی پارێزگا دەکەین."

 

لە بەرامبەردا، عومەر کروی، سەرۆکی ئەنجوومەنی پارێزگای دیالە داواکاریی ئەو 10 ئەندامە بە "نایاسایی" دەزانێت و دەڵێت: "رێژەی یاسایی لە دانیشتنەکەدا تەواو بووە."

 

ئەم کێشە یاسایی و سیاسییە لەکاتێکدایە، دانیشتووانی قەزای خانەقین لە دژی بڕیارە نوێیەکان و گۆڕینی پێگەی کارگێڕیی ناوچەکانی دەوروبەریان، مانگرتنی گشتییان راگەیاندووە و مانگرتنەکەش بەردەوامە.

 

ناڕازییەکان لەنێو ئەنجوومەن هۆشداری دەدەن کە ئەم بڕیارانە کێشەی دارایی و کارگێڕیی گەورە بۆ پارێزگاکە دروست دەکەن و دەبنە هۆی تێکچوونی سەقامگیریی سیاسی لە دیالە.