وەزارەتی نەوتی عێراق بۆ رووداو: بەرهەمهێنانی نەوتی عێراق کەمی کردووە

 

رۆژی چوارشەممە، 25ـی ئاداری 2026، د. ساحب بەزوون، گوتەبێژی وەزارەتی نەوتی عێراق،بە تۆڕی میدیایی رووداوی راگەیاند: "راستە ئاستی بەرهەمهێنانی نەوت دابەزیوە، بەڵام سوپاس بۆ خودا، ئێمە توانیومانە کۆنترۆڵی بەرهەمهێنانی ناوخۆیی بکەین."

 

گوتەبێژی وەزارەتی نەوت راشیگەیاند: "ئێستا رۆژانە نزیکەی ملیۆنێک و 500 هەزار بەرمیل نەوت بەرهەم دەهێنرێت." 

 

بە گوتەی د. ساحب بەزوون، ئەو بڕە نەوتەی بەرهەمدەهێنرێت بەم شێوەیە دابەش دەبێت: بەشێکی بۆ هەناردەکردنی دەرەکی، بەشێکی بۆ دابینکردنی پێداویستی و بەکارهێنانی ناوخۆیی، بەشەکەی دیکەشی بۆ دابینکردنی سووتەمەنی وێستگەکانی بەرهەمهێنانی کارەبا تەرخان دەکرێت.

 

پێش هەڵگیرسانی شەڕ، ئاستی بەرهەمهێنانی ئەو کێڵگانە نزیکەی 4.3 ملیۆن بەرمیل بووە لە رۆژێکدا.

 

 عێراق داوای لە کۆمپانیای ئینی ئیتاڵی کردووە بەرهەمهێنانی کێڵگەی زوبەیر بە بڕی 70 هەزار بەرمیل کەم بکاتەوە لەو 330 هەزار بەرمیلەی کە ئێستا بەرهەمی دەهێنێت.

 

بەپێی نووسراوێکی فەرمیی کۆمپانیای نەوتی بەسرە کە ئاراستەی کۆمپانیای (BP) کراوە "بەهۆی پڕبوونی کۆگاکانی نەوت و گەیشتنیان بە ئاستێکی مەترسیدار،  داوادەکات لە کاتژمێر 09:00ی بەیانیی رۆژی 24ی ئادارەوە، ئاستی بەرهەمهێنان و ناردنی نەوتی کێڵگەی رومەیلەی باکوور بۆ 350 هەزار بەرمیل لە رۆژێکدا کەم بکەنەوە."