بازرگانیی عێراق: بەشەخۆراکی چوار مانگی داهاتوو دابینکراوە
رووداو دیجیتاڵ
وەزارەتی بازرگانیی عێراق دڵنیایی دایە هاووڵاتییان کە هیچ کەمبوونێک لە مادەکانی سەبەتەی خۆراکدا نییە و رایگەیاند، بەشەخۆراکی چوار مانگی داهاتوویان بەتەواوی ئامادە کردووە.
رۆژی یەکشەممە، 26ی نیسانی 2026 محەممەد حەنوون، گوتەبێژی وەزارەتی بازرگانیی عێراق بە تۆڕی میدیایی رووداوی راگەیاند: "لە کۆگاکانی ناوەندیی و لقەکانی کۆمپانیای گشتیی بازرگانیی مادە خۆراکییەکان، تەواوی مادە خۆراکییە سەرەکییەکان بەردەستە. پرۆسەی دابینکردن و دابەشکردنی بەشەخۆراکیش بەگوێرەی خشتەی کاتی خۆیان و بەبێ هیچ بەربەستێک بەردەوامە."
گوتەبێژی وەزارەتی بازرگانی ئاماژەی بەوەشکرد، وەزارەتەکەیان زنجیرەیەک رێکاری پێشوەختەی بۆ بەهێزکردنی ئاسایشی خۆراک گرتووەتەبەر، ئەویش لە رێگەی دابینکردنی کۆگاکردنی زیاتر و واژۆکردنی گرێبەستی پێویست بۆ دەستەبەرکردنی سەقامگیریی سەبەتەی خۆراک لە قۆناخی داهاتوودا.
بەگوتەی محەممەد حەنوون، وەزارەتەکەیان رۆژانە بە وردی چاودێریی جووڵەی کۆگاکردن، گواستنەوە و دابەشکردنی مادەکان دەکات. هەروەها گوتی: "پێش ئەوەی مادەکان رەوانەی کۆگاکانی بەغدا و پارێزگاکان بکرێن و بەسەر هاووڵاتییاندا دابەش بکرێن، هەموویان پشکنینی تاقیگەیی وردیان بۆ دەکرێت بۆ دڵنیابوونەوە لە کوالیتییەکەیان."