ئەنجوومەنی پارێزگای بەسرە لە پارەی تەرخانکراو بۆ پارێزگاکە ناڕازییە

 

 

شوکر مەحموود عامری، سەرۆکی لیژنەی دارایی و کارگێڕی لە ئەنجوومەنی پارێزگای بەسرە رۆژی یەکشەممە 26ی ئایار بە تۆڕی میدیایی رووداوی راگەیاند، "ئەنجوومەنی پارێزگای بەسرە رۆژی 25ی ئایار نیگەرانی و ناڕەزایی خۆی لە بڕی پارەی تەرخانکراو بۆ پارێزگاکە بۆ ساڵی 2024 بە شێوەیەکی فەرمی دەربڕی."

 

سەرۆکی لیژنەی دارایی و کارگێڕی لە ئەنجوومەنی پارێزگای بەسرە گوتیشی، "بڕی پارەی تەرخانکراو بۆ بەسرە بۆ ساڵی 2024 تەنیا 852 ملیار دینارە، لە کاتێکدا بڕی پارەی تەرخانکراو بۆ پارێزگاکە لە ساڵی 2023دا دوو تریلیۆن و 890 ملیار دینار بوو."

 

عامری گوتی، "جیاوازی نێوان ئەم دوو بڕە پارەیە زۆر زۆرە، هەر بۆیە قبووڵکراو نییە. پارەکە بەشی پڕۆژەکان و قەرزەکانی پارێزگاکە ناکات."

 

سەرۆکی لیژنەی دارایی و کارگێڕی لە ئەنجوومەنی پارێزگای بەسرە ئاماژەی بەوەش کرد، "ئەوەی کراوە کاریگەری نەرێنی و زۆر خراپی لەسەر گەشەپێدانی پارێزگاکە، تەواوکردنی پڕۆژەکان و پلانی گەشەپێدانی پارێزگاکە بە گشتی دەبێت."

 

عامری گوتیشی، "ئەنجوومەنی پارێزگای بەسرە بڕیاریداوە ئەم هەفتەیە کۆبوونەوەیەکی نائاسایی بە ئامادەبوونی هەریەک لە پارێزگاری بەسرە، بەڕێوەبەری پلاندانانی پارێزگاکە و ئەندامانی بەسرە لە پەرلەمانی عێراق بۆ گفتوگۆکردن لەسەر بابەتەکە و بڕیاردان لەسەر هەنگاوی داهاتوو بکات."