نێردەی یەکێتیی ئەورووپا لە عێراق پێشوازی لە رێککەوتنی هەولێر و بەغدا لەسەر نەوت دەکات

 

 

رۆژی هەینی 26ی ئەیلوولی 2025 نێردەی یەکێتیی ئەورووپا لە عێراق لە ئێکس بڵاویکردەوە، "نێردەی یەکێتیی ئەورووپا لە عێراق پێشوازی لە رێککەوتنی نێوان حکومەتی فیدراڵیی عێراق و حکومەتی هەرێمی کوردستان دەکات سەبارەت بە دەستپێکردنەوەی هەناردەکردنی نەوت لە رێگەی بۆرییەوە بۆ تورکیا."

 

نێردەکە دەشڵێت، "هەبوونی هاوئاهەنگی چالاک لەنێوان حکومەتی عێراق و حکومەتی هەرێمی کوردستان بۆ سەقامگیری و خۆشگوزەرانی لە وڵات و هەرێمدا گرنگە."

 

دوای زیاتر لە دوو ساڵ و نیو لە وەستانی، هەولێر و بەغدا ئەم هەفتەیە رێککەوتن هەناردەی نەوتی هەرێمی کوردستان بۆ بەندەری جەیهان دەستپێبکاتەوە. 

 

جگە لە یەکێتیی ئەورووپا، هەریەک لە ئەمریکا و بەریتانیاش پێشوازییان لە رێککەوتنەکە کردووە. 

 

ئەمڕۆ، باڵیۆزخانەی بەریتانیا لە عێراق و کۆنسووڵخانەی گشتیی بەریتانیا لە هەولێر پێشوازییان لە رێککەوتنەکە کرد و رایانگەیاند: "ئەم رێککەوتنە هەنگاوێکی گرنگە بە ئاڕاستەی وەبەرهێنانی زیاتر و خۆشگوزەرانی بۆ تەواوی هاووڵاتیانی عێراق". 

 

ئاماژەیان بەوەش کرد، دەستخۆشی لە بەغدا و هەولێر دەکەن "بۆ پابەندبوونیان بە دیالۆگ بۆ گەیشتن بەم پێشکەوتنە".

 

دوێنێ، مارکۆ روبیۆ، وەزیری دەرەوەی ئەمریکا لە راگەیێندراوێکدا بڵاویکردەوە: "پێشوازی لە راگەیاندنی ئەو رێککەوتنە دەکەین کە لەنێوان حکومەتی عێراق، حکومەتی هەرێمی کوردستان و کۆمپانیا نێودەوڵەتییەکان کراوە بۆ وەگەڕخستنەوەی بۆریی نەوتی عێراق-تورکیا؛ رێککەوتنێک کە ئەمریکا ئاسانکاریی بۆ کردووە و سوودی بەرچاوی بۆ ئەمریکی و عێراقییەکانیش دەبێ".