یەکی تشرینی دووەم گەشتە نێوخۆییەکان لە فرۆکەخانەی موسڵەوە دەستپێدەکەن
رووداو دیجیتاڵ
نووسینگەی سەرۆکوەزیرانی عێراق دەڵێ، محەممەد شیاع سوودانی بڕیاریدا، 1ی مانگی داهاتوو گەشت لە فڕۆکەخانەی موسڵەوە بۆ پارێزگاکانی دیکەی عێراق دەستپێبکرێ؛ ئاماژە بەوەش دەکات، وەزارەتی گواستنەوە و پارێزگاری موسڵ کار لەسەر دەستپێکردنی گەشتە نێودەوڵەتییەکان لە فرۆکەخانەکەوە دەکەن.
نووسینگەی سوودانی دەڵێ: "رێکارەکان بۆ پێدانی مۆڵەتی کارکردن لەلایەن دەستەی فرۆکەوانی مەدەنی"ـەوە بەو کۆمپانیایەی کارەکانی فڕۆکەخانەکە بەڕێوەدەبات، تەواو بوون.
نووسینگەی سەرۆکوەزیرانی عێراق باس لەوەش دەکات، "بە چاودێریی سەرۆکوەزیران، وەزارەتی گواستنەوە و پارێزگاری موسڵ لە هەنگاوەکانی کۆتایی گفتوگۆکاندان لەگەڵ کۆمپانیا نێودەوڵەتییەکان بۆ ئامادەکردنی فرۆکەخانەکە بۆ گەشتە نێودەوڵەتییەکان".
10ى ئابى 2022 مستەفا کازمى، سەرۆکوەزیرانى ئەو کاتى عێراق بەردى بناخەى نۆژەن و ئامادەکردنەوەى فڕۆکەخانەى موسڵى دانا و رۆژی 17ی تەممووزی ئەم ساڵیش فرۆکەخانەکە کرایەوە.