بەرگریی شارستانیی عێراق رێنمایی بۆ شەوی سەری ساڵ بڵاوکردەوە

 

رۆژی هەینی، 26-12-2025، نەواس شاکر، گوتەبێژی بەرگریی شارستانیی عێراق بە تۆڕی میدیایی رووداوی راگەیاند: "داوا لە هاووڵاتییان دەکەین خۆیان بەدوور بگرن لە بەکارهێنانی یارییە ئاگرینە گەورەکان و ناشبێت منداڵان بە هیچ جۆرێک ئەو یارییانە بەکاربهێنن."

 

گوتەبێژی بەرگریی شارستانی دەڵێ، بەکارهێنانی یارییە ئاگرینەکان لەم شوێنانەدا قەدەخەیە:

 

- نزیک نەخۆشخانە، بازاڕ و فرۆشگا بازرگانییەکان.

 

- نزیک وێستگەکانی سووتەمەنی، تانکەری گواستنەوەی سووتەمەنی و مۆلیدەکان.

 

- نزیک دار و دارخورما و بینای نیشتەجێبوون.

 

- شوێنە داخراوەکان یان ئەو شوێنانەی قەرەباڵخییەکی زۆریان تێدایە.

 

نەواس شاکر گوتی: "نابێت یارییە ئاگرینەکان لەنێو ماڵ یان لە نزیک بوتڵی گاز و بەرهەمە نەوتییەکان هەڵبگیرێن،" داواشی  لە هاووڵاتییان کرد، "بۆ پاراستنی گیان و ماڵیان، پابەندی رێنماییەکان بن و دووربکەونەوە لە بەکارهێنانی یارییەکان بە شێوەی ئاسۆیی، چونکە بەو جۆرە مەترسیی گەورە دروست دەکەن."

 

جەختیشی کردەوە رایگەیاند: "هێزەکانی ناوخۆ راسپێردراون کە هەرکەسێک پابەندی ئەو رێنماییانە نەبێت و سەرپێچی بکات، دەستگیر بکرێ."