هاوکاریی 19 هەزار ژن لە عێراق بڕدرا، 'دەرکەوتووە شوویان کردووە'

 

 

حەسەن خەوام، گوتەبێژی وەزارەتی کار و کاروباری کۆمەڵایەتیی عێراق بە تۆڕی میدیایی رووداوی راگەیاند، رێوشوێنی یاسایی لە دژی 19 هەزار و 705 ژن گیراوەتە بەر کە پێشتر سوودمەند بوون لە هاوکاریی تایبەت بە جیابووەوە و بێهاوژین، لە دوای ئەوەی دەرکەوتووە، شوویان کردووەتەوە.

 

بڕی ئەو هاوکارییە بەگوێرەی ژمارەی ئەندامانی خێزانی ئەو ژنانەیە کە لە هاوژینەکانیان جیابوونەتەوە و لە نێوان 105 هەزار دینار بۆ 315 هەزار دینارە. 

 

گوتەبێژی وەزارەتی کار و کاروباری کۆمەڵایەتیی عێراق رایگەیاند، ئاشکرابوونی ئەو دۆسیەیە لە رێگەی سەردانی مەیدانیی تیمەکانیانەوە بووە و دەرکەوتووە گرێبەستی هاوسەرگیرییان لە دەرەوەی دادگاکان کردووە.

 

بەگوێرەی ئاماری وەزارەتی کار و کاروباری کۆمەڵایەتی، نزیکەی 500 هەزار بێهاوژین لە عێراق هاوکاریی مانگانە وەردەگرن.

 

گوتەبێژی ئەو وەزارەتە رایگەیاند، دەستبەجێ مووچەی ئەو ژنانە بڕدراوە و بانگ دەکرێن بۆ زانیاریی رۆژی هاوسەرگیریکردنیان بە دیاریکراوی، تاوەکو ئەو ماوەیە بزانرێت کە تێیدا هاوکارییان بە نایاسایی وەرگرتووە.