وەزارەتی گواستنەوەی عێراق: چین و عومان داوای بەشداریکردن لە رێگەی گەشەپێدان دەکەن

 

مەیسەم سافی، گوتەبێژی وەزارەتی گواستنەوەی عێراق بە تۆڕی میدیایی رووداوی راگەیاند، هەنگاوی باشیان ناوە لەبارەی نەخشەی کۆتایی پڕۆژەی رێگەی گەشەپێدان کە گەیشتووەتە 78%ـی هێڵی وشکانی و 88%ـی هێڵی ئاسنینی ئەو رێگەیە.

 

مەیسەم سافی گوتی، "ساڵی 2031 دیاریکراوە بۆ تەواوکردنی قۆناخی یەکەمی پڕۆژەکە، لە 2038 قۆناخی دووەم تەواو دەبێت و لە 2050 قۆناخی کۆتایی پڕۆژەکە دەبێت کە تێیدا ئەوپەڕی توانای خۆی دەبێت بۆ گواستنەوە."

 

پڕۆژەی رێگەی گەشەپێدان هەزار و 200 کیلۆمەتر دەبێت، لە بەندەری فاو لە بەسرە دەستپێدەکات تاوەکو دەچێتە سنووری باکووری کوردستان و تورکیا.

 

گوتەبێژی وەزارەتی گواستنەوەی عێراق رایگەیاند، رێککەوتنی لێکتێگەیشتن لەنێوان عێراق و تورکیا و قەتەر و ئیمارات هەیە بۆ جێبەجێکردنی پڕۆژەکە، عومان داوای کردووە بچێتە ناو پڕۆژەکە و چین داوای پێشکێش کردووە، کە ببێتە بەشێک لە پڕۆژەکە و دانوستاندن لەگەڵ وەزارەتی گواستنەوە دەکات بۆ بەشداریکردن لەو پڕۆژەیە یان جێبەجێکردنی.

 

مەیسەم سافی گوتی: "ڤیتۆ لەسەر هیچ وڵاتێک نییە بۆ بەشداریکردن لە پڕۆژەکەدا."

 

هێڵەکە بە 11 پارێزگادا تێدەپەڕێت و تێچووی 17 ملیار دۆلارە، دوو هێڵی ئاسن و وشکانییە بۆ گواستنەوەی کاڵا و گەشتیار.